Serlimar a core cu su director Henley Davelaar

ORANJESTAD – Hunta di Supervision di Serlimar a termina e relacion di trabou cu e director actual Henley Davelaar. Asina e compania a informa diahuebs merdia. ‘Mirando cu ta un contracto entre dos partido priva, no kier drenta den e detayes di e motibonan cu a conduci na e terminacion aki” e comunicado ta bisa. “Raad van Toezicht mester vela pa interes di e compania, cual ta rekeri pa un otro persona tuma e mando di e empresa cu e tarea pa sanea e situacion lo mas pronto posibel. 

RUMOR

For di algun dia tabata core rumor cu e compania lo a bay core cu e director debi cu e lo a actua di un forma incorecto y a crea mas gasto pa e compania, envez di sana e situacion. Davelaar a keda nombra dia 22 di October 2018 como e director ‘nobo’ di e compania, cu e meta pa guia e compania den un miho forma. A crea un problema publico debi cu e persona aki lo a bin di Corsou. Pero e tempo ey e minister na mando responsabel pa e compania, Otmar Oduber a sigura cu e persona aki ta e miho persona pa e funcion. Un di e metanan tabata pa Davelaar guia Serlimar den expansion di su servicionan y sigura entrada pa e compania. Awo ta mustra cu e persona aki no a logra e meta, pa cual a core cu ne awo.