Premier di Aruba a papia riba Venezuela cu presidente di Colombia

BOGOTA - Diaranson ultimo Premier Evelyn Wever-Croes a reuni cu Presidente Iván Duque di Colombia y un di e temanan discuti, tabata e preocupacion pa cu e situacion na Venezuela. Nan a delibera riba varios tema di interes mutuo, y especialmente Aruba a enfatisa cu mester estrecha lasonan mas, y traha riba mas intercambio comercial, entre otro riba tereno di salud, y cultural. Asina crea mas oportunidad y alivio pa nos comunidad.

RETONAN 

Premier Wever-Croes a expresa su preocupacion pa cu e situacion na Venezuela y e retonan pa nos paisnan. El’a expresa cu Aruba lo kier traha mas hunto pa combati crimen organisa. Tambe mas cooperacion riba comercio y turismo y cuido medico. Segun Wever, presidente Duque a bin cu un iniciativa di ‘comite bi-nacional’ den cual Colombia y Aruba lo scohe algun tema comun y yega na areglo riba nan. A bisa tambe cu di parti di Colombia nan ta hopi interesa den comercio di Aruba y Aruba ta interesa den inversionista di Colombia. Pa esaki ta trahando tambe riba un tratado pa evita double peso di impuesto.

SALUD

Riba tereno di cuido di salud tambe e mandatarionan a intercambia di ideanan con pa crea mas posibilidad. Gobierno di Aruba su meta ta pa mehora cuido di salud pa cuidadanonan di Aruba y mes momento baha gasto medico. “E tabata un bon reunion den cual nos a estrecha lasonan di amistad entre Colombia y Aruba aun mas”, Premier Wever-Croes a duna di conose.