Ley pa adapta apelacion den caso di belasting a pasa den Parlamento

ORANJESTAD - E concepto di ley pa adapta e hoger beroep den caso di belasting, “wijziging v/d Lv beroep in belastingzaken (AB 2001 no. GT 12) ivm de invoering van hoger beroep in belastingzaken (Invoering hoger beroep in belastingzaken en aanbrengen technische verbetering” a keda aproba diaranson merdia den Parlamento. (mira e ley aki)

E ley no ta cambia mucho den e procedura actual cu si bo no ta di acuerdo cu un cobransa, bo ta manda bo carta di obheccion na Inspector. Esey ta e bezwaar. Si bo no ta di acuerdo cu e decision ey bo por cuminsa un caso na Corte na Aruba dentro di dos luna di e fecha di e decision di Inspector. Y si despues di esey ainda bo no ta di acuerdo, bo por apela e decision dentro di dos luna di e decision na Corte di apelacion. Importante ta cu desde prome di januari no tin cu manda carta di apelacion mas na Curacao pero na Aruba mes.

Den e caso aki, partido MEP a entrega un mocion pa mustra nan precupacion. “E unico punto cu tabata tin nos preocupa tabata cu actualmente bo mester paga un seyo di 5 florin pa cuminsa e caso, y gobierno kier a aument’e pa 50 florin pa e prome instancia y 300 florin den apelacion”, lider di fraccion di MEP Evelyn Wever a bisa. Wever a considera esaki un aumento hopi drastico. “ Sinembargo mi a papia cu Minister Bermudez cu esaki ta crea un barera mucho halto pa esnan cu kier busca nan derecho y mi a pidi sr Bermudez pa reconsidera”.

Den casonan administrativo similar di LAR e sumanan ta 25 florin pa prome instancia y 75 florin den apelacion. “Nos a prepara un amienda tambe pa cambia e ley, pero Minister mes a entrega un nota di cambio y a baha e sumanan te 25 florin y 75 florin manera nos fraccion a pidi”. Cu esaki a crea mas proteccion pa ciudadanonan, especialmente awor cu Gobierno tin pensa di bai cobra belasting na forma mas intensivo ta bon pa tin mas proteccion tambe. E ta un iniciativa di fraccion di partido Democracia Real y su lider Andin Bikker. Na final, parlamentarionan a bay celebra cu un almuerzo, mirando e exito di e ley y e rapidez cu cual esaki a pasa.