Plasterk ta contesta Tweede Kamer diamars riba Aruba

DEN HAAG / ORANJESTAD – Diamars Minister Plasterk ta contesta miembronan di Tweede Kamer riba e asunto di Aruba. Dialuna e tabata breve den su declaracionnan na e cadena noticioso N.O.S. ya cu e tin intencion di contesta preguntanan di e miembronan di 2e kamer diamars. Esey tambe tabata e motibo segun su vocero suplente Julia Rademaker na NoticiaCla cu e no por contesta cierto preguntanan directamente, pa no interveni den e preguntanan na tweede kamer.

E unico pregunta riba e situacion di Aruba tabata riba e.o. e welga di hamber di premier Eman. Segun Plasterk, e ta respeta e welga. “Eman ta un homber adulto”. Pero e la yama e accion tambe no deseabel, esta e welga di hamber. Tambe Plasterk a confirma cu e la papia cu Eman n na telefon.

“Mi no ta spera cu esaki ta e forma pa resolve e asunto. Tur hende tin cu ta trankil y rasonabel” e mandatario hulandes a bisa. Plasterk no a haya prudente pa uza palabra ‘grandi’ aworaki, refiriendo na e declaracionnan di Eman diabierna, unda cu e (Eman) a yama e situacion un ‘secuestro, violacion “ door di Hulanda.

E problema segun Plasterk, ta cu e situacion financiero na Aruba no ta bon. E debe a redobla y si no bin medida, e stabilidad di e pais ta na peliger. “Presupuesto ta asunto interno, pero stabilidad di Aruba no” Plasterk a bisa. Y Plasterk no kier ta responsabel di no a actua ora cu ‘Aruba tabata na rand di abismo. Tambe Plasterk a sigura cu no tin ningun peliger pa pago di salario di trahadonan publico. Segun Plasterk, e declaracionnan haci di Eman riba e tema, como tal no ta corecto.