Guera entre presidente Mericano y lider di congreso ta sigui

WASHINGTON – E guera entre lider di congreso Mericano Nancy Pelosi y presidente Mericano Donald Trumpado a haya un dimension nobo diamars anochi durante e momento di discurso annual di Trump. Na comienso di aña, e presidente tin cu duna cuenta di e estado di e pais. Na e occasion ey diamars, Trump a nenga di duna Pelosi man na comienso di e evento. Pelosi na final a pague bek ‘kibrando e papel’ riba cual tabatin e discurso di e presidente. Ambos acto a bira e momentonan mas papia di e anochi. 

Ta usual cu ora cu e presidente yega Congreso, e ta duna tanto e vice presidente (actuando como presidente di congreso) y e lider di e congreso e copia di su discurso, y ta sigui pa duna ambos un man, como un gesto di cumindamento. Trump a opta pa saluda solamente su vice presidente pero no Pelosi. Pelosi a keda cu su man saca. E tabata un momento hopi notable, pero na final, Pelosi a dal bek. Ora cu Trump tabata finalisa e discurso, Pelosi a dicidi di kibra e papelnan di e discurso dilanti camera pa tur hende mira. Esey a bira e momento di e anochi y un señal cla di e sentimentonan cu e dos personan tin pa otro y e clima politico entre democrata y republicanonan. 

ABSOLUCION OF CONDENA

Awe tardi senado Mericano (domina pa republicanonan) tin cu dicidi futuro di e presidente Trump. Sea nan ta vota pa baha e presidente of absolve di tur loke e ta wordo acusa di dje. Ta premira cu lo absolve mirando cu mester di 2/3 parti di voto pa por baha e presidente. Pero e senado ta domina pa republicanonan y como tal ta kere cu Trump lo sobrevivi e momento ey awe tardi.