Maduro: SADA ta pone Aduana den mal luz sin ta necesario

ORANJESTAD – Sindicato SADA ta pone e cuerpo di aduana den mal luz sin ta necesario. Asina e mandatario responsabel pa e cuerpo, Xiomara Maduro ta bisa noticiacla.com. E ta referi na e reclamo cu e sindicato a haci durante e conferencia di prensa di diamars, riba un colega cu lo mester a haya un nombracion. Segun Maduro, a coregi e situacion pues no ta wak pakico ta haciendo e loke SADA ta haciendo. 

HALA ADEN

E mandatario a sigura e portal aki cu e nombracion en cuestion a wordo hala aden y ta pesey e Aduanero en cuestion a bay huez. Awor aki e caso ta bay den hoger beroep. “ Mi no ta mira pakiko SADA mester hiba e cosnan interno aki den publicidad. Esey no ta un acto integro na mi opinion” Maduro a sigui bisa. “Y ta masha mahos pa mira con ta lastra cu Minister President su nomber y insinua cosnan cu no ta berdad. Esey tampoco no ta muestra di integridad”.  Segun e mandatario, mester tene na cuenta cu un ambtenaar, sea e ta forma parti di sindicato of no, mester mustra respet pa su funcion y pa autoridad, den e caso aki sigur respet pa Minister President di e Pais aki. “Ta di lamenta cu di e manera aki ta pone Aduana den mal luz di dia sin cu ta necesario” Maduro a finalisa bisando.