Minister Besaril a coregi su declaracion riba Soca Contest riba social media

DEN HAAG  – Minister plenipotenciario pa Aruba na Hulanda Guilfred Besaril a coregi su declaracion riba Soca Contest riba social media. Asina su oficina ta aclarea pa medio di un comunicado. Esey ta bin despues cu el a haci algun declaracion fuerte riba Facebook, y despues a nota cu esaki porta no tabata e miho forma di actua.   

“Tumando na cuenta e reaccion den comunidad despues di su expresionnan riba rednan social durante e Festival di Soca Monarch na Aruba, Minister Plenipotenciario, sr. Guillfred Besaril ta desea na haci e siguiente declaracion” E comunicado ta cuminsa na bisa.  “Diadomingo durante e final di “Soca Contest” na Aruba mi a comparti cierto expresionnan riba mi Facebook wall cu a hala atencion di Pueblo y e medionan di comunicacion local. Apesar cu ta trata di expresionnan di indole personal den cual mi no menciona nomber y sin ningun contenido  obsceno alguno, mi ta admiti cu e expresionnan tabata duro y poco efectivo. " Mi ta carga un funcion publico cu obviamente ta duna masha poco espacio pa mi aspectonan personal. Por lo tanto artravez di e comunicado aki mi kier pa comunidad Arubano en general sa cu mi ta respeta e opinion publico duna y cu lo mi tene bon cuenta cu e experiencia aki na momento di expresa mi mes riba rednan social. Di es manera aki mi ta demostra na Pueblo cu mi a compronde nan mensahe. Mi kier a gradeci tur esnan cu a aserca mi y a comparti tanto nan pensamento como cariño cumi den e ultimo dianan. Y cu e mensahe aki mi kier a probecha na felicita tur e ganadornan di tanto e Festival di Calypso como esnan di Soca. Terminando mi ta desea tur clase di exito pa esnan cu lo participa den e Festival di Tumba e weekend cu ta bini”, asina Minister Plenipotenciario Guillfred Besaril ta termina su declaracion.

Nota pa redacion: E potretnan ta cortesia di Cas di Aruba