Prome caso confirma di corona virus na Belgica

BRUSELAS – Belgica a confirma nan prome caso di coronavirus. Ta trata di un di e 9 Belgo nan cu a keda evacua diadomingo for di Wuhan y treci pa Belgica. Su estado di salud ta mustra bon, y pa straño cu por zona, no ta mustra simptoma di e malesa. Asina mes, a constata cu e tin e coronavirus. A transporta e persona pa Hospital Sint-Pieters na Bruselas. E 9 Belgo nan a keda controla extensamente y eynan a constata e contagion. E otronan ta bon pero a pone nan den cuarentena pa 2 siman. E Belgo nan tabata den mesun avion cu e 15 Hulandesnan cu a keda evacua for di Wuhan. Entre e Hulandesnan no a constata nada particular. Nan tambe sinembargo lo ta den cuarentena pa dos siman. 

HULANDA

Na Hulanda no a constata ningun caso ainda di e virus, mientrsa cu na Francia, Inglatera y Alemania si esaki tabata e  caso. 

MORTO

E caso di morto mientrastanto a aumenta  na 425 persona na China. E total di persona contagia aworaki ta 20.438 persona. China a admiti cu nan a faya cu e combatimento di e virus.