Ley di Serlimar ta un prioridad pa minister nobo di medio ambiente

ORANJESTAD – E ley di Serlimar ta un prioridad pa minister nobo di infrastructura Marisol Lopez Tromp. Asina e mandatario a bisa dialuna mainta. Si tabatin cualkier duda cu e mandatario aki lo a desvia di e maneho di su predecessor, esey a keda desbarata dialuna mainta. ‘Si ta pa mi, e la pasa caba’. Asina Lopez Tromp a bisa dialuna mainta den su prome aparicion den conferencia di gobierno, riba e tema. Tratamento di e ley a para aña pasa debi na falta di sosten di coalicion. E mandatario cu ta encarga cu Serlimar a confirma di lo sigui e pensamento di su predecessor pues tin tur intencion di pasa ley aki mas liher cu ta posibel. 

CONTINUACION

E (reunion) tin cu continua. E reunion no a caba. “Na momentonan aki sigur e ta un prioridad pa por sigui cu e trabounan cu mester tuma lugar” e mandatario a sigui bisa. No ta cuestion cu tin cu entrega e ley di nobo, sino mas bien cambionan riba dje. “Mi por bisa cu e reunion publico lo tin cu continua, dus ora cu ta asina leu. Y mi ta spera cu pronto nos por haci esaki, na bienestar naturalmente di Aruba’, Lopez a finalisa bisando. Pa loke ta e consehonan di e colegio di supervision financiero CAFt, e mandatario a sigura cu lo tene cuenta cu esaki, relaciona cu e situacion financiero mas miho posibel manera cu e mester ta. E conseho di CAFt tabata pa gobierno stop di inverti den Serlimar y pa Serlimar drecha su problemanan di cobransa y pa nan mes sostene nan mes. 

LEY PEGA

Manera cu ta conoci, aña pasa e ley a keda trata na varios occasion pero cada bez tabatin un problema. Durante e prome siman di October aña pasa a para e tratamento di e ley ‘te proximo aviso’ unda cu a duna como motibo official cu tabata ‘laat’ y cu tabatin desordo den e sala. Sinembargo informacion cu e portal aki tin y cu a keda confirma tambe despues, ta cu no tabatin suficiente sosten interno entre partidonan di coalicion, pa pasa e ley aki. E situacion a causa te hasta cu un parlamentario di MEP e tempo ey, Daphne Lejuez a retira di e partido na mitar di November di aña pasa y a bira independiente.  E aviso mientrastanto pa continua cu e tratamento mientrastanto no a yega Parlamento ainda, te cu aña a bolter y cu e prome luna di aña 2020 a pasa caba.