DVG: Tin dato di pasaheronan cu tabata rond di famia Chines cu a bolbe Aruba

ORANJESTAD – Autoridad encarga cu salud, tin e datos di tur pasahero cu tabata den avion rond di e famia Chines cu a yega Aruba bek diadomingo atardi riba un buelo di KLM for di Hulanda, despues di a origina nan buelo di China. Asina vocero di departamento di Salud (DVG) Jurrete Maduro a bisa riba Facebook diadomingo pa clarifica un preocupacion. Si en caso, durante e periodo di cuarentena, e famia Chines presenta cu simptoma di coronavirus, DVG tin datos di tur e pasaheronan cu tabata rond di nan y por comunica cu nan pa tuma e siguiente pasonan. No ta conoci si e datonan ey ta datonan di e pasaheronan mientras cu nan ta na Aruba of no. 

PREOCUPACION

E preocupacion cu a cuminsa diadomingo tabata di con bin ta pone solamente e 4 miembronan di famia Chines den cuarentena, mientras cu nan ta bin den un avion yena cu mas hende. Y ta conoci cu un avion cera ta un area perfecto pa brote of malesa keda plama. Ora cu noticiacla.com a haci e pregunta ayera, e contesta tabata solamente cu ‘e famia no tin e simptomanan, pues no por papia di contagion’. Loke no a bisa e momento ey, tabata cu DVG lo tabatin tur e datonan of lo a colecta tur dato di pasaheronan rond di e area cu e famia Chines a sinta den e avion. Ta despues riba facebook di e.o. Noticiacla.com, cu e vocero di DVG a dicidi di añadi e pida informacion ey. Asina mes, e preocupacion a keda unda cu no por compronde con ta laga tur pasahero otro baha trankil, siendo cu nan tabata den mesun avion cu e Chinesnan. No ta conoci di cuanto pasahero a colecta data y kico e criteria tabata pa colecta e data di e pasaheronan. Esta con leu e pasaheronan mester ta sinta di e famia Chines, pa nan cay den e grupo cu ta ‘colecta’ datos.