Famia Chines bolbiendo Aruba diadomingo, lo bay den cuarentena

ORANJESTAD – Un famia Chines di 4 persona cu mester a bolbe Aruba diadomingo atardi for di China, lo wordo poni den cuarentena pa 2 siman. Asina minister di salud Dangui Oduber a bisa durante un conferencia extraordinario riba e tema di coronavirus. E famia ta residencia na Aruba y ta bolbe di un vacacion relaciona cu aña nobo Chines. E hecho cu e famia ta bay den cuarentena, no ta nifica cu nan a contrae e virus, sino ta hacie simplemente pa cautela. 

QUARENTENA

E procedura ta cu unabez cu e avion yega Aruba, personal di departamento di salud (DVG) lo subi avion y haci un control inicial di e personanan aki. Pa straño cu por zona, lo controla solamente e 4 personanan aki ya cu ta nan so ta biniendo di China, aunke no e area afecta di Wuhan. Unabez cu controla nan sintomanan, nan ta wordo transporta pa hospital pa asina wordo isola den un area special pa e periodo di 2 siman. Segun  e mandatario di Salud, Aruba ta prepara pa atende cu e situacion aki. 

CONTROL

A confirma tambe cu mientras cu e famia Chines nan buelo di regreso pa Aruba ta origina di China berdad, e no ta di e area afecta (Wuhan), y nan ta pasa varios ciudad (gateway) prome cu nan yega Aruba. Un di nan ta Amsterdam Hulanda, pa cual nan lo yega Aruba cu buelo di KLM. Na Hulanda, segun minister Oduber, tambe a haci un control, y na Aruba tambe lo haci e control ora cu e famia yega. 

INCUBACION

For di departamento di Salud, Sharline Koolman a splica cu no ta confirma cu (contestando pregunta di noticiacla.com) cu un persona por contagia otro persona ora cu e ta den e periodo di incubacion. E periodo di incubacion pa e virus ta 2 siman. Na Merca tin informacion cu e virus aki ta asina peculiar cu hasta den e periodo di incubacion, un persona por wordo contagia.