WEB cu donacion pa optimalisa calidad di nutricion habitantenan na SABA

ORANJESTAD – ‘Kisas inconscientemente nos mundo a pone mas esfuerso den laga hende yega un edad avansa. Sinembargo nos no a hinca mesun esfuerso den laga nan disfruta di esaki.’ Asina director di WEB Aruba, Oslin Boekhoudt a bisa na ocasion di entrega di un donacion na balor di Awg. 20.000,- na Stichting Algemene Bejaardenzorg Aruba (SABA). WEB Aruba ta haci esaki den cuadro di fin di aña y pa contribui na cuido di nos grandinan. Un director di SABA hopi agradecido, Hans Rokebrand, a indica cu lo uza e donacion pa optimalisa e calidad di nutricion di habitantenan di Centro di Cuido na San Nicolas y pa esnan di Huize Maris Stella na Savaneta.

Te awor tawata prepara e cuminda na e localidadnan na Playa y transporta esaki pa e otro localidadnan. Cu e donacion lo cumpra ekipo pa un transporte di e cuminda mas adecua, pa mihor preserva su calidad nutritivo. Tambe eventualmente lo utiliza e cushina satelite na Centro di Cuido San Nicolas di forma cu lo por prepara cuminda na e localidad ey, asina Mariesol Alves, Lokatiemanager di e centro di cuido ta añadi.

Aparte di optimalisa e calidad di e nutricion, e cushina satelite ta contribui na eficiciencia den gastonan di operacion di SABA. WEB Aruba ta hopi consciente cu circunstancianan actual ta afecta operacion di e centronan di cuido di SABA. Pa e motibo ey a dicidi di haci e donacion di 20 mil florin. Director Oslin Boekhoudt, hunto cu relacionista publico Asja Dongen, a bishita e Centro di Cuido na Palisiaweg pa personalmente nan entrega e cheque.

Durante e encuentro sr. Rokebrand a informa cu un grupo di trabou special lo ta encarga pa realisa e proyecto den e aña nobo. Boekhoudt a gradici e empleadonan di SABA pa nan motivacion y dedicacion y a finalisa bisando cu e tin un gran confiansa cu e proyecto pa operacionalisa e cushina riba termino cortico lo bira uno exitoso. A finalisa e encuentro cu un recorido den e centro, caminda e representantenan di WEB Aruba por a haya un impresion di e trabou cu e team di SABA ta haci na e Centro di Cuido, cu e meta pa haci e estadia di e habitantenan mas agradabel posibel.

E combinacion di potret ta duna un impresion di e entrega di e cheque den compania di Oslin Boekhoudt y Asja Dongen di WEB Aruba, Hans Rokebrand y Mariesol Alves hunto cu miembronan di e team di Centro di Cuido di SABA na San Nicolas.