No por castiga e polis responsabel pa morto di Zinnia, dos biaha

ORANJESTAD – E agente policial cu a keda sentencia como responsabel pa a causa morto di e hobencita Zinnia Croes 5 aña pasa na Aruba, no por wordo castiga dos biaha. Asina noticiacla.com a compronde di su investigacion haci riba e caso, despues cu e famia di Croes a haci un reclamo publico contra e minister di Husticia di Aruba Andin Bikker. E reclamo tabata pa su ‘falta di accion’ riba e caso Zinnia mientras cu di otro banda e ta purbando di intermedia den e caso di e Arubiano Mitch Henriquez cu a muri na Hulanda na 2015. Segun Croes, e mandatario lo a priminti mas accion contra e polis envolvi den e caso Zinnia, pero no a haci nada mas. 

REACCION

For di oficina di minister di husticia Bikker, noticiacla.com a compronde cu e mandatario a opta pa no reacciona riba e articulo, pero a mustra mesora cu e mandatario a haci tur loke tabata posibel pa ‘acomoda’ e preocupacion di e famia di Zinnia Croes. Den un comentario pa e portal aki mes na 2018, e mandatario a duna su ‘opinion personal’, cu e lo kier pidi pa e polis wordo retira di su funcion. Awor ta resulta cu esey no tabata posibel segun LMA, debi cu e mandatario a haya contesta di e departamentonan concerni, cu debi cu e polis a haya un castigo caba (sentencia tabata trabou comunitario di 240 ora y kita rijbewijs pa 2 aña), y segun un sentencia di huez,  polis en cuestion no por wordo castiga dos biaha. De hecho, e polis a wordo degrada di rango y awor lo ta trahando den oficina y no mas riba caya. Hopi mas, e mandatario lo no por haci, su oficina a laga sa. 

PROMESA

Segun e mama Michella Croes na e portal aki diabierna mainta, e mandatario nunca no a informa nan di e caso di e polis, y no a ‘follow up’, cu nan kico ta kico y con lo a para cu e promesanan cu e mandatario a haci. Y awor cu a tuma nota di e intento pa intermedia den e caso di e homber Mitch Henriquez, ta cuestiona con ta bay yuda eynan siendo cu ni na Aruba no ta cumpli cu palabracion haci. Mes momento, e famia di Zinnia a bisa di tin tur comprension pa cu e famia di Mitch Henriquez y ta sostene e famia all the way den nan lucha pa husticia.