FTA: Por lo menos 50 persona na CITGO a keda sin trabou awe

SAN NICOLAS – Entrante awe tin por lo menos 50 persona sin trabou, y sin sa kico ta spera nan entrante e luna entrante.  Asina e presidente di sindicato FTA Hubert Dirsksz a contesta noticiacla.com riba e situacion actual na e refineria CITGO. E personanan aki a tuma nan pakete di retiro y awor mester wak kico ta pasa. Un grupo limita a wordo pidi pa keda pa un periodo chikito di un luna. No ta conoci pa e portal aki cuanto nan ta. 

SITUACION

For di ayera e trahadonan cu a retira, a bandona nan lugar di trabou na CITGO Aruba Refinery y a ‘ruim op’ nan oficina of otro espacio di trabou. Awe, nan ta sinta na cas, sin trabou y sin sa kico ta pasa otro siman ora cu luna nobo habri. Tin speransa si cu e compania cu Refineria di Aruba (RdA) a lanta na December, por cuminsa tuma nan pronto den servicio pa asina continua cu e operacion di e terminal. Prome minister di Aruba a confirma na e portal aki cu RdA a lanta e compania ‘en caso nan tin cu tuma over e terminal’. Si esaki ta bira realidad no ta conoci ainda. Te cu diabierna atardi, no tabatin informacion di gobierno si a logra yega na un acuerdo cu CITGO pa loke ta e e terminacion di e operacion pa gobierno haya e yabi di e compania.