Michella Croes: Minister kier interveni na Hulanda pero ta laga caso na Aruba keto

NIJMEGEN – Si e kier cuestiona actuacion hudicial na Hulanda relaciona cu e caso di Mitch Henriquez (dfm) , minister di husticia di Aruba Andin Bikker mester cuestiona na Aruba tambe con para e caso di e hobencita Zinnia Croes cu a fayece casi 5 casi aña pasa ora cu un polis a dal e riba caminda. Asina e mana Michella Croes-Matos a bisa noticiacla.com for di Hulanda diabierna. Croes mes ta bibando na Hulanda pa motibo di su salud. E mandatario e siman aki a cuestiona husticia Hulandes su forma di atende cu e caso Henriquez y a priminti cu e lo manda carta puntra Hulanda kico ta kico. 

INTERVENCION 

Bikker e siman aki a informa cu e ta bay manda carta pa colega minister di Hulanda, riba e forma di proceder den e caso di e Arubiano cu a muri na Hulanda durante un problema cu polis na 2015. E famia di Henriquez a cuestiona con cosnan ta bayendo, y minister Bikker ta di acuerdo cu e pensamento di e famia y a dicidi di ‘interveni’. Si e lo tin resultado, no ta conoci, pero a priminti diahuebs cu e lo purba wak kico e por logra cu su intervencion. 

CASO ARUBA 

E mama di Zinnia ta bisa mesora cu e ta sostene famia Henriquez den nan lucha. Pero aki tambe e como mama kier pa e minister tin atencion pa su caso. “Nos ta hopi rabia. Nos a wordo priminti shelo y tera, y nada no a wordo haci” Croes ta cuminsa na bisa. E ta haya mes momento hopi ‘netjes’ cu e minister kier yuda famia Henriquez, y cu ta algo na su lugar. “Pero mi ta pensa cu aworaki nos ta na e punto cu na Aruba mes nada no a wordo haci (pa e caso di Zinnia). Con bo ta bay interveni. Si na Aruba bo no por a cumpli, con bo ta haya haci esey na Hulanda” Croes a sigui bisa. E ta pensa cu si por haci esey pa Hulanda, mester por hacie na Aruba tambe. Por lo menos loke e mandatario a priminti. 

PROMESA

Segun Croes, e minister a priminti e.o. cu lo actua riba castigonan duna. E ta referi na e sentencia di huez di e tempo ey unda cu e polis envolvi, mester a haya castigo disciplinario. Huez a sentencia e polis casi 3 aña despues di e accidente, cu e polis tabata responsabel pa e morto di Zinnia cu a sosode dia 13 di maart 2015.  E sentencia tabata 240 ora di trabou comunitario y a kita su rijbewijs pa dos aña. Mas no por a haci pasobra trabou incompleto di investigacion di polis a stroba e huez di bay mas leu. A yama nan ‘fayo den investigacion di polis”. “Nada no a pasa” e mama ta bisa. “E mucha muher cu a dal Zinnia cu auto, ainda ta cu su trabou. Unico cos cu el a haya ta algun ora. Ni un boet” Croes a sigui bisa. “Nos ta cuestionando e manera cu e minister ta actuando y a laga e caso di Zinnia gewoon drumi”. Croes ta haya cu Bikker mester actua na Aruba tambe pa mustra cu tin confiansa den nos sistema hudicial. E no ta papia di mete den trabou di huez of e sentencia, pero si follow up riba e loke mester a sosode cu e polis envolvi y tuma paso pa evita cu cosnan asina no sosode mas. E sa cu e no por trece Zinnia bek, pero por lo menos actua riba palabranan priminti. 

MINISTER RIBA E CASO

Tabata na juli di 2018 cu durante un conferencia di prensa, e minister en cuestion a reacciona riba e tema aki caba. Na tal occasion e mandatario a bisa cu si ta p’e, e polis J. Vriend -cu a keda haya culpabel pa morto di e hobencita Zinnia Croes- mester haya e castigo disciplinario maximo, cu ta retiro di su funcion. E mandatario a bisa NoticiaCla e dia ey durante conferencia di prensa, cu esey ta su opinion personal. Pero e mandatario mester a warda e conseho di e departamento di recurso humano, cu mester a bin cu un recomendacion oficial, kico por haci cu e polis aki. E mandatario a bisa anteriormente caba cu dependiendo di e resultado di e caso, cu por a spera mas castigo disciplinario. E mandatario a topa cu e famia despues di e sentencia pa e polis responsabel, y lo a a haci cierto declaracion y ‘promesa’ pero segun e famia ta bisa awor, no a cumpli cu nan.