FTA: Ta mustra dificil pa CITGO keda cla pa bandona Aruba diabierna

SAN NICOLAS – Faltando un dia pa e fecha di ‘cierre’ di e refineria CITGO, no tin claridad ainda si lo caba na tempo of na manera premira. Asina presidente di sindicato FTA Hubert Dirksz a bisa Noticiacla.com diahuebs. Mientrastanto e deadline cu tabata ayera pa trahadonan firma, a wordo hala pa diaranson otro siman pa asina e trahadornan haya chens pa pensa y firma, Dirksz a sigui bisa. “ Awor tur cos ta cerca Gobierno y  RdA pa termina e negociacion cu CITGO” e presidente a continua bisando. 

REUNION

Segun Dirksz, FTA a reuni cu su miembronan y ta acepta e oferta cu tin riba mesa. “ Aparentemente e mayoria di trahador ta aceptando pero te cu awor aki nos no a haya informacion oficial di cuanto trahador a firma. Nos ta pendiente pa e firmamento final entre gobierno y CITGO pa haya sa kendenan lo keda traha” Dirksz a sigui bisa. “ Diamars mainta nos a reuni cu gobierno RDA y merdia cu e trahadornan. 

CLAUSURAManera ta conoci, CITGO Aruba Refinery (CAR) a anuncia algun tempo atras cu nan ultimo dia di operacion ta dia 31 di januari 2020 (diabierna awor) y cu despues e gerencia ta bandona Aruba. E trahadornan ta den un incertidumbre con e traspaso lo tuma lugar.