Merca usando Aruba PreClearance tambe como un punto di control pa corona virus

MIAMI – Merca ta usando Aruba como un di su puntonan di control pa e corona virus. Mas specifico, e parti di US Pre Clearance na aeropuerto. Asina e portal di noticia NBC News ta raporta for di Miami. E mensahe ta cu oficialnan Mericano di Salud Publico ta ampliando nan control riba e virus, na puntonan di entrada internacional pa Merca. Y un di e puntonan ta aeropuerto di Miami, bou di cual tambe ta cay Pre Clearance, esta entrada di Aruba pa Merca. 

CDC

E departamento federal di salud Mericano CDC (Center for Disease Control) a cuminsa check yegadanan na 5 aeropuerto Mericano cu tabatin buelonan directo for di China. Awor a aumenta e control na 15 ‘stacion di cuarentena rond Merca, aeropuerto y otro lugarnan unda cu trahadonan di salud ta check yegada di biaheronan pa simptoma di posibel malesa. “Un di e aeropuertonan ta Miami International, cual station ta inclui e Pre Clearance di Bahamas y Aruba, y tur waf na Florida, Alabama y Mississippi. Tin 10 miyon pasahero ta drenta Merca via Miami anualmente. No a haya reaccion ainda di gobernantenan di Aruba riba e parti specifico aki.