Fazio: Drecha fluho di pasahero saliendo di Aruba ta reto mas grandi

ORANJESTAD – Drecha e fluho di pasahero saliendo for di Aruba, ta considera como un di e prioridadnan mas halto pa e CEO nobo di aeropuerto, James Fazio. Apenas 2 luna den funcion, Fazio ta placenteramente sorprendi cu e aeropuerto di Aruba. Considera como uno moderno, e ta mira hopi futuro, pero tambe reto pa e aeropuerto ‘chikito’ di Aruba. “E aeropuerto di Aruba tin e mesun retonan cu otro aeropuertonan rond mundo tin”, Fazio a confia na NoticiaCla.com. Y ora cu e bandona Aruba, e kier laga un aeropuerto saludabel, solido financiero, un master plan efectivo y trahadonan vibrante.

Fazio a bin Aruba cu 30 aña di experiencia di aeropuerto, y esaki ta pone cu su trabou por ta mustra ‘facil’ pe. Facil ta relativo, si mira cu Aruba ta un isla, cu tin su retonan manera cualkier isla y pais. Aumento di pasahero, proyectonan capital, añadi mas ‘gates’, facilidad di maleta etc, ta algun proyecto cu Fazio kier mira realisa. Hunto cune ta bin retonan manera recursonan limita. E aeropuerto ta limita den capacidad di expansion. Hunto cune, mester percura pa no gasta mas cu mester, pa mantene e aeropuerto solvente financieramente.

Bek pa e reto mas grandi, Fazio ta mustra cu e problema mas grandi ta e fluho di pasahero lagando Aruba. Tin mucho faceta cu e pasahero tin cu pasa, prome cu e yega na su area di salida final. “Nos mester regla esey miho. E mester ta un fluho facil, cu menos dolor di cabes, y cu ta pone e pasahero yega mas lihe na e concesionan tambe. “Para un ora den rij na sea imigracion of seguridad, ta un ora cu e pasahero no por gasta na e tiendanan of concesion. Y esey ta nifica menos entrada pa e concesion y tambe aeropuerto” Fazio ta bisa NoticiaCla.com.

Pa logra e cambionan, ta traha den dos forma. Un asina yama ‘quick fix’ unda cu den termino cortico ta logra resolve algun asunto. Entre nan ta menciona e 10 kiosconan automatisa pa por check in pasaheronan biahando pa Merca. Un proyecto cu a keda introduci apenas e siman cu a pasa. Fuera di esey tin proyectonan di 18 luna pa 2 aña durante cual por nota mehoracionnan significante segun Fazio.

 E aspecto laboral segun Fazio, no ta un problema grandi. “E leynan no ta mucho diferente di otro lugarnan pa loke ta aeropuerto. Simplemente ora di tuma hende na trabou, mester percura pa tuma e hendenan corecto, cu cual por traha un carera largo pa aeropuerto” Fazio ta bisa.

Fazio tin su mannan yen pa e proximo 5 añanan, cu ta e termino di su contracto manera cu e ta poni awor. “Si mi ta keda despues, tin cu keda determina ainda” Fazio a bisa. Su predecesor a bin cu un contracto specifico, y a surpasa esey varios biaha. Si esey ta e caso cu Fazio, no ta conoci. Loke NoticiaCla.com a nota, ta cu e trahadonan, for di e trahado mas ‘simple’, te na e gerente mas halto bou di Fazio, tur ta papia extremadamente bon di Fazio. Den apenas 2 luna. “E ta un persona humilde, hopi sabi, cu sa masha hopi di aeropuerto”, “E ta un ser humano cu ta pone e factor humano prome. Bo por papia cune. E ta diferente” ta algun di e comentarionan cu den apenas dos luna, trahadonan ta bisa di Fazio. Un bon comienso, den corto tempo.