Salazar: Keda atento pa e situacion di virus corona nobo

ORANJESTAD – Nos mester ta atento pa e situacion di salud, relaciona cu e virus nobo corona, segun epidimiologo Wilmer Salazar di Departamento di Salud. Durante un conferencia di prensa diamars mainta, Salazar a splica e origen di e virus nobo aki, y a hink’e den contexto pa compronde miho kico ta loke nos ta confronta of por spera. A haci mencion p.e. di e dos otro virusnan mundial cu a crea hopi noticia, esta Sars y Mers. Ambos a cobra bida, y ambos tabatin nan origen y a plama mundialmente. 

E VIRUS NOBO

Segun Salazar, datonan ta hopi limita debi na e novedad di e virus aki. Pero loke por a bisa ta cu e virus ta uno cu ta parse un griep comun, y tin su forma di afecta esnan mas debil, manera mucha y personanan cu tin un malesa caba. Nan ta mas vulnerable pa e malesa aki. E malesa ta di origen di bestia, pero cu tempo a haya su forma di plama di humano pa humano. E ta dal asina duro cu e por te hasta causa morto. 

EPIDEMIA

Mientras cu e no ta un epidemia ‘ainda’, e por wel bira uno y como tal ta alerta comunidad pa ta pendiente y vigilante riba simptomanan cu por duna indicacion di un posibel contagio. Mes momento, e situacion ta ‘limita’ ainda mirando cu un persona por bira ‘sospechoso’ di ta contagia solamente si el a biaha pa China (e area afecta specificamente) of si el a drenta den contacto cu un persona cu a haci e biahe ey. E hecho cu tin hende cu a keda infecta caba na Merca, ta mustra cu e chensnan ta mas grandi awor si cu e por plama. Potret ta cortesia Telearuba.