Maduro: No tin ningun caso registra den Caribe di corona virus

ORANJESTAD – Den Caribe no tin ningun caso registra ni sospecha di e virus nobo, esta corona virus. Esaki segun miembro di DVG Eugene Maduro a bisa durante un conferencia di prensa diamars mainta. “E riesgo ta abou” Maduro a sigui bisa. E hecho si cu tin casonan na Merca, ta pone cu esaki por tin consecuencia, aunke cu e posibilidadnan ta abou ainda. 

CIFRA

A haci mencion di cifra tambe aunke e cifranan ta cambiando hopi liher. Segun Maduro, loke ta pone e cifranan cambia liher ta cu ta refina e testnan cada bes cu ta pone cu mas y mas hende ta keda raporta como un persona cu a contagia e virus. A raporta cu te cu awor como 106 persona a muri a consecuencia di e virus, pero tur ta na China y 40% ta hendenan cu tabatin malesa cronico caba. Tin un total di 4587 caso confirma mundialmente tambe. 

INCUBACION

Loke ta interesante ta cu e tempo di incubacion ta di 2 pa 10 dia, aunke hasta den e periodo aki, un persona por keda contagia cu e virus aki. Potret ta cortesia Telearuba.