No por stop e corona virus di drenta Aruba pero mester ta prepara p’e

ORANJESTAD – “ Bo no por stop e, pero mester ta prepara p’e”. Asina e hefe di departamento di malesa contagioso Sharine Koolman a bisa durante un conferencia di prensa dialuna riba e tema di e virus nobo corona. Segun Koolman, no ta cuestion cu por frena e virus di crusa frontera y drenta Aruba, pero nos mester ta simplemente prepara pa por atende cu ne ora cu e yega. Y tur plan ta ‘in place’ pa haci esaki. E unico problema ta cu como cu e ta un virus nobo, no tin un plan ‘kant en klaar’ specifico. Loke a haci ta pa usa e plan general y traha for di esey. 

MELDING

E hecho cu nos ta forma parti di Reino Hulandes, ta pone cu nos ta ‘mara’ na raportahenan di Hulanda riba e malesa aki, segun e structura ta poni di World Health Organization (WHO). Tanten cu nan (Hulanda) no meld nada, Aruba no por haci nada. “E mester ta algo official pa nos por actua” Koolman a sigui bisa. 

CASO DI FAKE NEWS

Koolman a atende e parti tambe di e fake news di diadomingo cu tabata mustra cu lo tabatin un caso confirma di e virus na Aruba. Mientras cu e no a bay den detayes, Koolman a splica cu ta un piloto a raporta un pasahero cu lo tabatin e simptomanan. A resulta sinembargo cu e persona aki no ta cuadra cu e criterianan, y como tal e persona sigur no ta un caso pa atende cu ne. No obstante esey, a atende e persona y a dun’e tur atencion necesario y a splik’e. E ta un persona residente di Aruba cu a bin di afo. Unabez cu e noticia a sali, a para e informacion den sentido cu a sigura comunidad cu ta trata aki di ‘fake news’, y cu e caso pues no ta berdad. Potret ta cortesia di Telearuba.