Tin varios plan di contingencia pa atende cu caso di CITGO

ORANJESTAD - CITGO Aruba Refinery a indica cu lo kier bay pa 31 di januari awor for di Aruba. Prome minister di Aruba Evelyn Wever Croes a mustra cu ta purbando di keda cla e siman aki ainda. CITGO ta liber pa bay, pero tin miedo cu nan lo por bay sin entrega e yabi di e refineria y cu esaki por desemboca den un debate legal cu por dura hopi tempo. E situacion ta tenso segun e mandatario y e ta considera e siman aki como uno crucial. Segun Wever, e motibo pa cua ta importante pa yega na un areglo di terminacion di contract cu Citgo ta pa asina Gobierno por haya e oportunidad pa drenta y drecha caminda cu mester drecha. E ekiponan den e refineria ta den mal condicion y hasta tin ta den cay den otro. E waf tambe a mustra señalnan di hopi mal condicion. Y di un caminda Gobierno lo mester haya e placa pa haci e inversionnan necesario. 

PLAN DI CONTINGENCIA TIN 

Wever a duna di conoce tambe cu e miho cos cu por pasa pa Aruba ta pa Citgo bandona e isla pa asina Gobierno busca un otro operador. Mientras tanto e compania estatal, RDA, a cuminsa prepara pa e momento cu Citgo bay. Opcionnan cu tin ta, cu si Citgo bay e fin di luna aki, ya dia prome di februari mester tin ekipo eynan pa sigui cu e trabounan di e terminal na unda cu na februari un otro barco lo drenta cu gasolin, fuel y HFO y asina garantisa e suministro. 

RUMOR RIBA FUEL

Contrario na e rumornan di fin di siman na unda a conseha tur hende pa bay tank nan auto pasobra gasolin lo caba na Aruba, Prome Minister ta enfatisa cu e suministro local niun momento tawata na riesgo y lo no ta na riesgo tampoco pasobra Gobierno tin un Plan B.

COMPANIA PA TUMA OVER

Plan B, segun Prome Minister ta encera e compania cu RDA a lanta pa opera e terminal y tuma over e trabounan, Terminal di Energia Aruba. E compania aki ta un compania estatal cu ta cay bou di RDA y RDA bou di Gobierno. Pa motibo di e menasanan di Citgo di lo bay un ora pa otro, e compania aki mester a bin pa sigui cu e trabounan especialmente pa e parti di gasolin, HFO pa WEB y jetfuel. 

MEDIADO TA YUDANDO

Pa loke ta trata e trahadonan, Prome Minister a referi na e reunionnan cu ta tumando luga na unda cu tin mediador di Gobierno den e negosacionnan. E compromiso di Gobierno ta pa percura pa pronto haya un operador nobo cu lo tuma nan over. Algun lo wordo tuma den servicio pa Terminal di Energia Aruba pa garantisa cu e trabounan na e waf ta continua ora cu e barco yega na februari. 

ATAKE 

Pa loke ta trata e diferente atakenan di oponentenan, Prome Minister ta duna di conoce cu nan ta bin di esnan cu no ta desea pa Citgo bay pasobra esaki lo no conbini nan saco pa motibo di e hopi beneficionnan personal cu nan tawata tin cu Citgo. Sinembargo pa Gobierno, Aruba ta conta. Y cu Citgo, nos lo no mira desaroyo economico den nos pais. P’esey, Citgo mester bay.