Gasoline na Aruba ta baha atrobe diaranson awor

ORANJESTAD – Despues cu 8 dia pasa a bin un anuncio ‘abrupto’ di aumento di gasoline di 4 cent pa liter, gobierno a informa diamars cu gasoline na Aruba ta baha diaranson awor, 10 di december, cu 9.3 cent pa liter te na 196,7 cen pa liter . Esaki ta conforme e regla normal cu ta anuncia tarifa nobo di gasoline cada di dos diaranson di luna. Banda di gasoline unleaded premium, diesel tambe ta conoce un rebaho. Esaki ta di 6.9 cent pa liter te na 181,3 cen pa liter y kerosin ta baha cu 7.6 cent pa liter te na 171,4 cen pa liter . Minister di Asuntonan Economico, Comunicacion, Energia y Ambiental ta informa cu a surgi un cambio den prijs di productonan petrolero. E prijsnan ta inclui BBO.

Tabata 8 dia pasa (1 december) ora cu e anuncio a bin di un forma 'abrupto cu e prijs di gasoline unleaded a bolbe subi na Aruba. E biaha aki e la subi cu 4,1 cent pa liter, na 206,0 cent pa liter. Esaki a bin como un sorpresa pa hopi, mirando e forma con prijs di petrolio a bin ta baha rond mundo. Mientras cu no a bisa esaki, NoticiaCla.com a compronde cu esaki ta un efecto directo di e introduccion di e 'health tax' di 1%. Y pesey tambe no a warda te e di dos diaranson di luna pa haci e cambio. Un otro cambio ta cu normalmente ta presenta e cambio di prijs di gasoline, riba e di dos diaranson di luna. E biaha aki sinembargo, esaki a sosode riba e prome dia di luna. A bira conoci despues cu esaki tabatin su motibo, y cu e cambio di prijs regular, lo a continua.