Polis kier ayudo pa resolve caso di candela di Cacique Macuarima School

MACUARIMA – Den un intento pa por haya ayudo pa resolve e caso di incendio di Cacique Macuarima School, polis diabierna a suministra potretnan clave di e posibel sospechoso(nan) y tambe posibel testigo presente. Cu esaki, posiblemente por yuda identifica e personanan y asina resolve e caso mas liher. Ta mustra cu e caso a resulta mas dificil pa resolve, pero  no imposibel. 

E CANDELA   

Manera ta conoci, e candela a wordo sendi intencionalmente diadomingo, 12 di januari 2020, pa mas of menos 11’or pa 12’or di anochi. Recherche di Santa Cruz ta desea di papia cu tur hende cu por a mira algo riba e dia aki of cu pa casualidad por sa algo cu lo por yuda cu e investigacion. Tambe recherche di Santa Cruz ta desea di papia cu personanan cu durante e fecha ey, tabata den vecindario di scol Cacique Macuarima y cu por a mira algo cu por yuda solucciona e kimamento aki.

POTRET

Riba e portret por mira un auto, probablemente un Toyota Agya, cu tabata para dilanti di e school durante di e candela. E ocupantenan por ta posibel testigo valioso di e caso aki. E peticion ta pa e personanan aki por acudi na recherche Santa Cruz. Pa cu e sospechosonan, por wordo mira cu un tin un postura cortico y e otro cu un haltura un poco mas largo. E sospechoso cortico ta bisti den un ‘hoody’. Bou di e hoody e tin un otro shirt y e tin un carson cortico. E sospechoso cu haltura mas largo ta lomba sunu y e tin un carson cortico bisti. Probablemente el a pasa su T-shirt over di su cabez. Riba su lomba por mira un prenda/joya. Probablemente e ta un cruz di un Rosario. 

INFORMA POLIS 

Si un hende ta reconoce e personan aki of ta reconoce e auto, of bo tin conocemento di algun informacion di e incidente aki, bo ta wordo suplica pa presenta na recherche Santa Cruz, of pa tuma contact cu polisnan di Recherche Santa Cruz na number di telefoon 527-2927, of via e-mail:  dar4@kparuba.com. Tambe por laga tips anonimo riba e tiplijn di Cuerpo Policial Aruba, number 11141.