MEP: Dialuna Luigi Bergen ta sali y Darlaine Guedez ta drenta Parlamento

ORANJESTAD - Dialuna awor Parlamentario Luigi Bergen ta retira di su funcion y Darlaine Guedez Erasmus ta bira e Parlamentario nobo di MEP. Asina e partido geel a pone riba nan pagina di Facebook diahuebs anochi. Manera anuncia un tempo pasa, sr. Luigi Bergen a tuma su retiro di Parlamento despues cu el a wordo acusa pa su ex-casa pa maltrato, un acusacion cu sr.Bergen ta mantene di ta falso. Sinembargo partido MEP a palabra reglanan di integridad halto y Luigi Bergen respetando e palabracionnan aki, a entrega su retiro boluntariamente pa por concentra riba su defensa den e caso. No tin un ley cu ta exigi esaki, y esey ta demostra cu pa partido MEP integridad no ta simplemente un palabra, sino e Partido ta pone den accion tambe.

Luigi Bergen lo no ricibi overbruggingstoelage debi cu e no a cumpli 6 luna den Parlamento, y tampoco lo bay ocupa un funcion halto den Gobierno, manera a wordo specula pa oponentenan.

Sra. Darlaine Guedez-Erasmus tabata number 17 riba e lista di MEP na 2017 y a obtene 525 voto. Darlaine ta casa y ta mama di dos yiu. El a lanta den e districto di Paradera y tabata activo den varios actividad social den bario. E tin un HBO diploma Sociaal Pedagogische Hulpverlening y a traha cu adictonan, problemanan social, problemanan den famia y ultimo dos aña a traha cu Minister Glenbert Croes riba e tereno social. Awor Darlaine lo por aplica su conocemento, experiencia y vision den e organo constitucional mas halto di Aruba.