SMOA: Colegio Arubano a bay den alerta pero no ta tin menasa nobo

ORANJESTAD – Colegio Arubano mes no a haya ningun menasa nobo di school shooting. Asina Stichting Middelbaar Onderwijs Aruba (SMOA) a manda bisa mayornan den un carta diahuebs y tambe despues un comunicado pa prensa. Loke a sosode ta cu social media a plama un anuncio, cu a pone cu e scol a bay den un tipo di ‘lockdown’ atrobe, unda cu a aumenta seguridad adicional atrobe. Segun SMOA, e scol a pasa e informacion aki pa Korps Politie Aruba (KPA). Nos scol mes no a ricibi niun menasa nobo.

SEGURIDAD ADICIONAL

Como resultado di e mensahe aki, SMOA a percura pa personal di seguridad adicional: awemainta tabata tin polis tur rond di scol. “ Den caso cu nos ricibi instruccion di KPA pa cera e scol, nos di Colegio Arubano lo comunica esey mesora na boso” SMOA a sigui bisa

MEDIDA DI SEGURIDAD

Riba dialuna, 20 di januari 2020 a tene un encuentro informativo pa e docentenan y demas personal tocante school shooting. Esaki tabata na encargo di departamento di prevencion di KPA. Desde november ultimo, nos scol a desaroya un Plan di Seguridad (Veiligheidsplan) y pronto lo reevalua su contenido. E plan aki ta riba nos website: http://colegio.ca-ict.net/ (Over ons) desde november 2019. Scol a drenta den contacto cu Minister di Enseñansa y Ministerio di Husticia pa hunto tuma e medidanan relaciona cu seguridad di scol.E prome paso ta pa duna informacion y training na e alumnonan. E meta ta, entre otro, pa delibera den klas riba e peligernan cu nos por confronta. SMOA ta solicita pa desde awo traspasa informacion nobo riba e tiplijn anonimo di polis 11141. E informacion ta keda anonimo. 

CONTROL TA KEDA POSIBEL

Segun SMOA, como autoridad na scol y cu seguridad di tur na mente, por sigui cu control. P’esey ta importante pa cada alumno tin su Colegio kaart den su posecion pa e por identifica su mes.  Ta evidente cu e alumno mester tin su uniform di Colegio bisti. “Nos ta confia den e expertonan cu ta brinda nos nan asistencia, nos tin den contacto continuo cu KPA y hunto nos lo percura pa pas regresa na nos scol” SMOA a finalisa bisando.