Colegio Arubano atrobe bou di menasa di ‘school shooting’

ORANJESTAD – Un biaha mas Colegio Arubano (Playa) ta bou d menasa di un ‘shool shooting’ (tiramento na scol) y ta bou di alerta estricto. Fuentenan na Colegio a confirma cu debi na e mensa awe, a bolbe pone e scol bou di medidanan mas halto di seguridad. Polis tambe a informa cu nan ta investigando e di dos caso aki di menasa di ‘school shooting’.

CONTROL

Awe mainta por a nota presencia berdad di security cu porta cera controlando alumnonan drentando scol. Mescos cu a sosode e prome biaha, a pone un control severo, causando liñanan largo pafo di scol. Esaki ta e di dos biaha den un luna cu e scol ta bou di un menasa asina. Tur persona cu drenta, ta keda ristra na porta di entrada di scol. 

POLIS

Mientrastanto polis a confirma e situacion di alerta awe mainta. “ En conexion cu un posibel menasa di active shooting riba un scol cu ta circulando den un chatgroup y tambe cu ta riba rednan social,  Cuerpo Policial  ta haciendo su investigacion. E caso ta wordo trata cu prioridad y seriedad di parti di Cuerpo Policial” e mensahe tabata awe mainta. Biaha pasa e persona cu a haci e menasa, a keda deteni y despues laga den libertad bou di condicionan severo. No ta conoci si esaki ta e mesun persona of un ‘copy cat’, esta un persona otro cu a copia e ‘menasa’ aki. 

DI DOS BIAHA

Na comienso di aña escolar caba Colegio a haye den un situacion asina ora cu na December a drenta e menasa caba y ora cu scol a habri bek, a pone alerta y seguridad extra pa evita cualkier situacion fastioso. A logra gara e hoben cu a haci e menasa. Despues Colegio a informa cu e scol tabata bek na ‘normalidad’ atrobe. Pero awor, cos a bolbe cambia. Nota; E potret ta di un situacion awe mainta unabez cu scol a cuminsa caba awe mainta na Colegio Arubano y ta mira e seguridad para pafo.