Produci Tumba di Corsou ta caro pero tin bon premio tambe pa ganadornan

Produci Tumba di Corsou ta caro pero tin bon premio tambe pa ganadornan

Posted on 01/22/2020 10:53 am AST | Updated on 01/22/2020 10:54 am AST

ORANJESTAD/WILLEMSTAD – E produccion di Festival di Tumba di Corsou ta uno costoso, cu tin un prijsplaatje di 350 mil florin segun presidente di Asosacion di Musico di Korsou (AMAK) Manfred ‘Feco’ Gomez. Pa esaki a logra sigura por lo menos 9 branding partners cu tin un contribucion substancial cada uno pa por sigura cu tur cos ta cubri. Fuera di esey, premionan pa e ganadornan, ta hopi y bon, pa asina tin motivacion pa nan tin participacion. Entre e premio mayo, tin un auto regalo pa e ganador di Tumba 2020. 

E GASTONAN

E gastonan ta hopi segun Gomez, y ta ensera e stage, pago di tur trahado, y tur otro cos organisatorio, incluyendo e produccion di transmission. Pa esaki a logra haya por lo menos 7 pa 8 branding partners cu cada un ta injecta 40 mil florin pa asina por sigura cu tin cen pa por paga tur gasto. Diahuebs awor posiblemente ta anuncia un of dos branding partners mas, pa asina e festival ta bon cubri. 

PREMIONAN

E premionan tambe ta cuantioso, y esaki segun Gomez, ta pa sigura cu tin participacion di e banda y cantante, pasobra tin hopi gasto pa e participacion. Esaki pasobra e bandanan tin hopi gasto cu nan participacion. Nan mester tin instrument, paga refuerso di afo, ensayo etc. Como tal e premionan ta core den miles di florin pa e ganadornan. For di momento cu e participante cay den finalista, e ta haya pago. Areglo tambe ta paga bon y asina por sigui menciona. A compronde cu p.e. un persona cu a compone y aregla e tumba, por bay cas trankil cu 25 mil florin na premio. E ta mas cu e ganador ta gana na placa, pero e ganador e aña aki ta bay cu un auto tambe. 

  • Powered by SETAR