Aruba tin tres cantante den Festival di Tumba di Corsou

ORANJESTAD/WILLEMSTAD – E aña aki Aruba tin 3 representante den Festival di Tumba di Corsou. Asina e presidente di Asosacion di Musico di Korsou (AMAK) Manfred ‘Feco’ Gomez a anuncia durante conferencia di prensa na Aruba. Un total di 59 cantante a inscribi, reparti riba tres dia, pa despues saca 30 finalista cu tin cu competi riba e anochi final esta dia 31 di januari proximo. 

REPRESENTANTE DI ARUBA

E tres representantenan di Aruba ta Patrick Raven cu ta participa cu Excellence Band cu e cancion Di Bo Mi Ta, Shurby Maria cu ta cu Curacao Banda Show y e cancion Bin wak e show, y Jurick Salomon cu ta bay cu Highway Band y e cancion Paz den mi cas. Jurick y Shurby ta canta riba e di dos dia di festival, mientra cu Patrick ta riba e ultimo dia cu ta diaranson. 

WILD CARD

A informa cu e biaha aki lo tin wild card tambe. Pues fuera di 25 cantante cu ta keda selecciona, hurado ta bin cu un lista extra di 25, cu lo ser mira riba video e diahuebs di ‘sosiego’, y for di e grupo ey, ta selecciona 5 mas cu ta completa e 30 finalistanan cu ta participa e diabierna di final. Un cambio cu a bin debi cu e ta duna chens na esnan cu a luci na comienso p.e. pero como cu ‘no tabatin e ambiente trempan’, a cay afo. A pasa segun Gomez, cu uno cu a bira hopi popular, no a cay den e finalnan pa e motibo ey. Y basa riba comentario di e cantantenan, a opta pa bin cu e wild card.