SAN NICOLAS - Vitrectomia ta un operacion di wowo (retina) hopi dificil, complica y importante ku antes no tabata posibel na Aruba. Aruba tabata manda miles di pashentan afo pa tratamento di wowo, tur sorto di tratamentonan cu no ta por na Aruba. Miyones di florin tabata wordu gasta pa manda pashentnan afo pa cuido di nan wowo. Awor nos hendenan por haña cuido na Aruba mes ya cu ImSan awor a inverti den un clinica especialisa den cuido di wowo y tin ekipo “state of the art”. A informa cu nos doctornan y nursenan a haña hopi entrenamento pa por uza lo ultimo de lo ultimo y awor nos pashentnan por keda serca di nan famia.
E prome docter pa haci e operacion tabata Dr Moreno y e promer operacion di retina den historia na Aruba pues a tuma lugar na Imsan mes.
Minister di salud Dangui Oduber ta considera esaki un otro “milestone” y cambio grandi den cuido medico na Aruba pa mehora nos servicio y cuido medico. “Sinti e cambio den salud publico. Nos ta cumpliendo cu nos maneho y vision pa mehora cuido na Aruba”.
ORANJESTAD – Mas cu mitar di studiantenan local (Aruba) cu a studia usando e prestamo escolar ‘Dienst Uitvoering Onderwijs voor studenten en scholieren’, conoci como DUO, tin problema pa paga esaki bek , ta paga menos cu nan mester paga, of mas pio, no ta paga nada bek mes. E grupo aki ta sigui ta un problema segun representante di DUO, Marit Verbogt manera cu e la splica diahuebs den e programa Noticiacla LIVE. Si tin mas of menos 4000 ex studiante cu tin cu paga bek, y ta algo di mas di mitar tin e problema, por deduci cu e cantidad aki ta mas cu 2 mil studiante local. Verbogt ta splica kico e situacion ta, den e video adhunto. E siman aki e representantenan ta na Aruba te cu otro siman diabierna pa atende cu e grupo aki y tambe studiantenan cu kier un beca via DUO. Nan por acudi na e centro John F Kennedy durante oranan specifico cu ta ubica riba e pagina di FB di nan y tambe e portal di DUO.
ORANJESTAD – E situacion di Dengue na Aruba ta birando mas alarmante. Diahuebs Departamento di Salud Publico a informa cu a cuminsa hospitalisa hende cu ta infecta cu Dengue. Ta trata di 2 persona. Un di e personanan aki ta bek na cas, y e otro ta sigui interna cu complicacionnan serio debi na Dengue. Por a verifica cu ningun di e personanan aki a biaha recientemente, indicando cu ta trata aki di dos caso di Dengue di transmision local. DVG ta informa tambe cu ta observando mas caso cu ta di spera – of cu ta normal – pa e temporada aki.
ORANJESTAD - Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.
ORANJESTAD - Entrante 18 di april 2024, pa 9or di anochi via TeleAruba, Aruba completo lo por cuminsa presencia e serie documental ‘Blue Lizard Effect’. Un serie documental revolucionario cu ta profundisa su mes den e mundo fascinante di Aruba, pero di un angulo diferente. E serie ta explora e concepto energetico di felicidad y e conexion profundo cu e cultura, e hende, y naturalesa di e isla.