Nada ainda di huramentacion di minister y parlamentarionan ‘nobo’

ORANJESTAD – Ainda no tin ningun novedad ‘publico’ di e cambionan den tanto gobierno como Parlamento cu tin cu tuma lugar. Publico, pasobra internamente cosnan ta canando for di November caba y ta trahando pa e cambionan (di minister y parlamentario) tuma lugar. E cambionan cu mester a sosode na cambio di aña den tanto gabinete Wever Croes como Parlamento no a tuma lugar. Esaki ta encera cambio di minister (pa partido POR) y parlamentario (partido MEP y POR). E cambio mester a tuma lugar prome cu cambio di aña pasa, pero a informa cu ‘ta tuma su tempo’ pa keda cla cu tur cos y no tin pura. 

MOTIBO DI TARDANSA

For di ex minister y actual lider di partido POR Otmar Oduber,  e portal aki a compronde cu enberdad e proceso ta tumando mas tempo cu normal, pero ta spera den e proximo oranan pa dia, lo e keda cla y cu por anuncia huramentacion di e respectivo personanan den nan funcion. E proceso a cuminsa segun Oduber, fin di November (screening) y ta tumando 7 pa 8 siman, compara cu e 6 siman cu a tuma ora cu e gabinete actual  (Wever Croes) a sinta na 2017. Pero segun Oduber, no tin nada straño cu a sosode cu a causa e tardansa. Pa loke ta parlamento, presidente Ady Thijsen a bisa solamente cu e situacion ta status quo y nada nobo. Di parti di gobierno mes, e portal aki no a haya nada official ainda riba fecha pa e cambionan tuma lugar. Oduber  ta papia di ora y dia pero gobierno mes no a bisa nada. Den gang, ta papia cu den seno di MEP lo tabatin problema pa cu salida di Bergen pasobra e lo kier a wordo acomoda temporalmente, y cu lo tabatin exigencia halto. Pero den partido ningun hende no a confirma esaki. 

CUA TA E CAMBIONAN

Pa loke ta e cambionan cu tin cu sosode, esaki ta e cambio di awor ex minister Otmar Oduber pa actual parlamentario Marisol Lopez Tromp cu lo tin cu bira minister, despues cu Oduber a retira na december. Y tambe e cambio di actual parlamentario Luigi Bergen di Mep pa Darlaine Guedez Erasmus despues cu Bergen a acepta pa retira (temporalmente) te ora cu investigacion riba su persona termina. Tambe tin e aspecto di cambio di parlamentario Marisol Lopez pa Dellanire Maduro.