Gobierno ta bay duna permiso pa cultiva cannabis medicinal na Aruba tambe

ORANJESTAD – Un frase den e comentario di e colegio di supervision financierto CAFt riba e presupuesto 2020, a revela cu gobierno di Aruba ta bay bende licensia pa cultiva cannabis na Aruba tambe, siendo cu inicialmente a bisa cu ta duna permiso pa importa solamente. Minister di Salud Dangui Oduber a confirma e aprobacion dialuna pa noticiacla.com, riba pregunta di e portal aki. Esta cu gobierno ta bay duna e permiso ey tambe. 

RAPPORT

Interesante ta cu prome cu e rapport/comentario aki di CAFt a sali, gobierno mes no a sali afo ainda y bisa cu ta bay duna permiso pa cultiva cannabis medicinal. Tabata den e rapport di CAFt tabatin un frase cu ta ilustra entre otro un di e entradanan cu gobierno kier genera pa 2020, cu ta licensia pa no solamente importa sino tambe cultiva cannabis . E frase specifico den e rapport ta bisa “Gobierno tin plan pa facilita e produccion di cannabis”. Ademas tin un parti cu ta papia di duna licensia pa esaki. Y via e licensia entre otro, lo genera otro fondo pa caha di gobierno.

CAMBIO DI PENSAMENTO

Tabata algun siman pasa ainda cu e portal aki mes a puntra e mandatario pa clarifica si ta bay duna permiso pa importa y cultiva cannabis medicinal, y e mandatario a bisa specificamente cu ta solamente importacion. Ora cu a puntra Oduber riba e cambio, e mandatario a contesta “ Na e momentonan ey ainda e tawata den discusion, esta ora e pregunta a wordo haci” Oduber a bisa. Tambe el a bisa cu e permiso ta duna caba pero pa legalisa uso medicinal pa importacion. “ E decreto ministerial a wordo publica den afkondigingsblad, e ta publico”. 

SPECIFICO

Ora cu a puntra e mandatario pa ta mas specifico y si tin garantia cu ta solamente medicinal por cultiva y con e proceso lo ta, e mandatario a bisa “Nos lo duna importvergunning pa importa y tambe licensia pa produci. Si, e plantacion ta pa finnan medicinal solamente, dus e producto final mester ta pa uso medicinal” Oduber a sigui bisa. Anto ora cu a sigui insisti riba e cambio, e contesta aki tabata esun siguiente”  E cambio aki manera minister di Economia a menciona, ta pa crea un pilar economico. E voowaarden nan pa cultivacion lo ta hopi estricto y ta pesey gobierno ta bai haci esaki na e manera di mas responsabel cu tin” e mandatario a sigura e portal aki. 

MESTER LEY

E portal aki a compronde enberdad cu pa por duna permiso pa cultiva plantacion di cannabis medicinal, mester haci cambio den ley, particularmente e articulo 4 den e LV verdovende middelen. E no ta algo cu por haci cu un landsbesluit sino un landsverordening. Pa esey, lo mester bay parlamento pa haci e cambio di ley aki. Pues si minister a firma e decreto pa por haci e cultivo, polis lo por actua toch, pasobra e no ta ancra den ley. Y e mandatario a clarifica despues cu enberdad mester cambia e ley pa por permiti cultivo di cannabis medicinal.