CAFt na gobierno: Resolve problema di cobransa di Serlimar envez di aumenta subsidio

ORANJESTAD – E Colegio di supervision financiero (CAFt) den nan conseho riba e presupuesto 2020 di pais Aruba, ta recomenda pa ‘resolve e problemanan di cobransa y aumento di tarifa di Serlimar’, pa evita cu gobierno mester aumenta su ‘subsidio’ na e compania ey. Asina e ta conseha gobierno den su ultimo comentario riba presupuesto 2020. 

AUMENTO SUBSIDIO

Segun CAFt, den e presupuesto ta nota cu gobeirno a aumenta e subsidio pa Serlimar cu 1.5 miyon florin ‘debi cu e proceso pa cobra pa e recohemento di sushi y procesamento di sushi no ta optimal’. Ta haci mencion tambe di e impasse cu tin den Parlamento (ainda) pa loke ta e ley di Serlimar cu mester regula e parti nobo di cobransa di Serlimar. “CAFt ta conseha pa resolve e problemanan rond di e accion di cobransa y aumento di fondo (di Serlimar) liher, pa asina evita cu gobierno mester saca placa atrobe pa cubri esaki. Ademas ta conseha gobierno pa laga e ‘obligacion di gobierno’ pa elimina deficit di Serlimar cai. Cu esaki e ta implica cu gobierno mester stop di cubri e gasto y pa laga Serlimar mes genera su fondonan riba s mes di tal forma cu no mester mas subsidio.