Parlamento a aproba dos ley di salud unanime

ORANJESTAD – Parlamento a aproba dos ley pa e.o. garantisa mas calidad di cuido y registracion uniforme di profesion medico unanime diamars atardi. Despues di votacion a bin un aplauso grandi pa motibo cu tabata wardando pa hopi tempo riba e leynan aki. Y tambe e debate tabata uno cu a bay mas riba contenido, asina presidente di parlamento a expresa contento na final riba e nivel di reunion ayera na e matutino Bon Dia Aruba.

Tur partidonan a vota pro y tabatin varios mocion y tambe 2 amienda cu tambe a wordo aproba unanimamente. Un di e amienda tabata di AVP pa trece un cambio den ley di registracion pa por evalua dentro 6 luna di su ehecucion. Y despues cada aña pa por garantisa cu e profesion- nan cu no ta aparece den e ley e biaha aki por ser regla via Landsbesluit of otro ley (cu no mester necesariamente aprobacion di Staten). Awor Aruba tin su mesun registracion y regla mas cla pa admiti mediconan cu kier traha aki. Tambe tin dos profesion cu mester registra oficial awor, locual ta fisioterapista y nurse. Tur profesion medico registra ta cay bou di e ‘tuchtrecht’. Esaki ta nifica cu e mediconan ta responsabel huridicamente.

E otro ley pa trece mas calidad den cuido tin di haber cu e separacion di inspeccion di salud di e Departamento di Salud. Asina e inspeccion ta bira un organo independiente pa haci control riba e sector medico. Awor no tin un inspeccion riba su mes, e ta cay bou Departamento di Salud y no ta mucho efectivo. Kehonan di pashent no ta wordo trata lihe y e departamento no tin suficiente poder pa investiga of pa actua contra dunado di cuido cu a faya. Den e parti di prevencion tampoco suficiente ta wordo haci.