CAFt: Forma con gobierno a cumpli cu norma pa presupuesto 2020 no ta corecto

CAFt: Forma con gobierno a cumpli cu norma pa presupuesto 2020 no ta corecto

Posted on 01/20/2020 11:33 am AST | Updated on 01/20/2020 11:37 am AST

ORANJESTAD – Mientras cu gobierno ta cumpli cu e normanan di e deficit financiero, e forma con a logra esaki ta pa 55 miyon florin logra di forma incidental. Y esaki no ta e forma cu e colegio di supervision financiero CAFt ta sugeri pa e sosode, sino kier mira solucion structural. Asian e colegio ta skibi den su conseho inicial pa e prespuesto 2020 di pais Aruba. Ademas, segun CAFt, gobierno ta pasa ‘e reto’ pa cumpli cu e norma di presupuesto di un forma duradero, pa e proximo añanan (envez di regla esaki awor). Pues, mientras cu gobierno ta cumpli cu e norma segun CAFt, e forma cu ta cumpli cu ne, no ta corecto. Algo cu e portal aki a nota cu den pasado e gobierno anterior tambe a haci. Esta usa entrada incidental pa tapa y cera buraconan habri. Y for di e tempo ey caba CAFt tabata cuestiona y ‘condena’ e practica aki. Con no a tuma medida e tempo ey, no ta conoci y ta algo cu CAFt nunca a contesta. 

PESO RIBA ENTIDADNAN DI GOBIERNO

Ta conoci cu gobierno a usa entidadnan di gobierno pa tapa cierto ‘buraconan’ den e presupuesto, pa asina evita di pone esaki den un forma di ‘medida’ pa comunidad. Por corda con a evita asina di introduci e.o. e sugar tax, pero e opta mas bien pa saca placa di ‘extra’ dividendo di companianan di gobierno. Ademas, mientras cu gobierno a ‘saca’ e placa for di dividend, no a specifica esaki suficiente. Tambe CAFt ta preocupa cu gobierno lo ta ‘chicando’ mucho riba e entrada di e entidadnan aki. Gobierno a confirma caba cu a ‘pidi’ tur e companianan aki pa duna ‘mas’ cu normal di nan dividendo, y e companianan aki a cumpli tambe. 

AUMENTO GASTO

CAFt a constata tambe cu di banda di gasto, tabatin un aumento di por lo menos 30 miyon florin, compara cu e presupuesto 2019. “Pa cumpli cu e norma pues, a aumenta e entradanan pero no a baha e gastonnan”.  Como conclusion, CAFt ta haya cu e presupuesto 2020 no ta haci suficiente pa logra finanzas duradero pa pais Aruba, cu ta algo cu e LAFt y protocol ta boga pe. Den esey, e presupuesto 2020 no ta cumpli suficiente. Lesa e conseho completo AKI

 

  • Powered by SETAR