Explosion di gas na Calbas cu herido

ORANJESTAD - Diamars marduga algo prome cu 4'or y 45, un explosion fuerte por a wordo scucha na Calabas y becindario. Mesora ta drenta un informe cu ta un explosion di gas a caba di tuma lugar na un cas na Calabas y cu un persona a keda gravemente herida. Di biaha a manda polis, ambulance y brandweer na e cas na Calabas. Na yegada nan ta topa cu un cabayero cu kemaduranan di segundo grado, y ta bin compronde cu e botter di gas no a rementa pero cu ta e instalacion di e gas tabata tin un lek y esaki a explota. E botter di gas mes no a ricibi niun daño. Pero esaki a wordo hala mesora y poni canto di e cura. Personal di ambulance a trata e victima na e sitio y a transporte cu hopi urgencia pa hospital. E explosion a causa hopi daño na e parti patras di e cas. Pida pida panchi tabata tira den cura di bisiña y dilanti den e cura. Slachtofferhulp tambe a wordo pidi pa atende cu e famia di e victima.