Cabesante Croes: Mester lesmaterial pa alumnonan di skol cu a kima

ORANJESTAD – Prioridad di cabesante di Cacique Macuarima Scool, Rachelle Croes-Caster, ta acumula material di scol pa e alumnonan, esta les material, leermiddelen, schrift, pen, potlood. Hopi alumno di e scol, debi na e candela, a perde tur nan material cu nan tabatin warda den nan banki. Algun a perde set di etui completo, nan cosnan cu nan tin propio. E intencion ta pa keda cla pa dialuna scol por cuminsa bek aunke den un forma diferente (varios alumno ta keda realoca na otro scol pa un periodo). 

REACCION DI COMUNIDAD

Reaccion di comunidad pa e daño na Cacique Macuarima School ta hopi grandi. Asina cabesante di e scol, Rachelle Croes-Caster a bisa noticiacla.com. Ayudo ta drentando na cantidad y esey ta hopi bon segun Croes. Mientrastanto tur loke a wordo kima a keda kita y limpia, tur cos a bay dump, y a yena basta container cu material cu no por a usa mas. Aworaki e klaslokaalnan (4) ta completamente bashi. Ainda e marca di candela si a keda cu ta mustra e rastro di e daño. 

CUANTO KLAS TA AFECTA?

Tabatin confusion di cuanto klas a keda afecta. Segun Croes, e scol tin 4 gevel, unda cu por bisa cu 1 di e gevelnan a kima paden parcialmente. E candela a core entre e plafond y e dak, cu ta nifica cu a afecta e edificio te na e otro banda unda cu tin baño di mucha muher. “Nos por bisa cu tur lokaal a haya daño di candela mes. Cuater lokaal plus baño di mucha muher. Esun cu a haya mas daño, ta e klas 6B y 5B pasobra nan a kima por completo cu tur material den dje” Croes a sigui bisa. Klas 4A y 4B tambe a haya hopi daño di awa y huma. 

SCOL BEK

Henter siman e scol tabata ‘cera’ den sentido cu muchanan no a haya les pa motibonan obvio. E problema di e shinishi cu tabata bula rond, falta di coriente y awa cu tambe tabata pega. Ayera DOW a keda cla cu pone awa y tambe Elmar a keda cla cu coriente. A aloca material pa otro klasnan por bay otro scol y pa dialuna scol por cuminsa bek na Cacique Macuarima y e otro scolnan unda cu e muchanan a keda aloca.