SKOA: Gasto total pa drecha Cacique Macuarima no ta conoci ainda

ORANJESTAD – Mientras cu donacionan ta drentando na cantidad pa e scol cu a sufri daño grandi na candela, esta Cacique Macuarima School, e cantidad cu mester pa drecha tur cos, ainda no ta conoci. Asina director di Stichting Katolieke Onderwijs Aruba (SKOA) Anuesca Baly a bisa Noticiacla.com.   Mientrastanto dialuna awor, e scol ta habri bek pa duna les, conforme e adaptacionan cu a keda haci. 

DAÑO FINANCIERO 

E daño financiero completo no ta completamente conoci segun e director Anuesca Baly a bisa Noticiacla.com. E expert di ‘schade’ a haci su trabou caba y a comproba cu e edificio mes ta den bon estado, fuera di e dak, pues esey ta elimina hopi costo extra. Pero un prijs ainda completo, no ta conoci. Unabez cu e lugar ta completamente ‘limpi’ di e daño, SKOA lo bay busca oferta rond na contratistanan pa asina haya un idea di cuanto e daño ta y cuanto placa mester pa por drecha tur cos. 

SEGURO

Lamentablemente no tabatin un seguro pa ‘inboedel’, esta material, cu ta pone cu tur loke a bay perdi eynan, ta ‘perdi’ y daño ey ta hopi grandi. Buki, C-Touch Screens, y cosnan te hasta personal di alumnonan cu tambe a bay perdi den e candela, material traha. Asina mes, tin hopi cos cu a keda ‘dona’ pa asina por sigui traha despues toch, manera e 4 C-Touch screens cu gobierno a duna. Tin 4 airco cu tambe a wordo duna y asina tin un cantidad di cos mas cu a keda duna. 

REEMPLAZO

Mientras cu gobierno ya caba a compromete cu e screennan, e bankinan etc mester wordo reemplaza pa gobierno, e parti di banki y stulnan den klas tambe ta cay pa cuenta di gobierno. E parti di e bukinan, e methodo cu ta usa pa duna les, tambe mester keda reemplasa. SKOA su tarea den esaki ta pa supervisa e trabounan completo, y pa percura pa mas liher posibel, e muchanan ta bek den nan lugar ‘original’.

TRAILER

Pesey tambe a opta pa no pone trailer (modular) na scol, pa asina e no bira un custumber. “Un modular ta cuminsa como algo temporalmente y ta bira algo permanentemente” Baly a bisa. A dicidi cu ta pone tur mucha den un otro alocacion (manera a informa caba), contal cu no pone modularnan riba tereno di scol.