Un proximo paro na refineria CITGO por afecta suministo di gasolin

ORANJESTAD – Mientras cu e no ta e scenario cu nan kier bay pe, si e situacion no drecha na CITGO Aruba Refinery (CAR) den e proximo dos simanan, trahadonan (por lo menos esnan afilia na sindicato FTA por bay den un tipo di accion total cu lo afecta comunidad. Mester pensa entre otro, cu e scenario mas extreme lo ta suministro di gasoline na Aruba. Asina presidente di FTA Hubert Dirksz a splica den e programa NoticiaCla LIVE diahuebs anochi. Nan no kier bay den e direccion ey, y ta haciendo tur lo posibel pa evita esey. Pero si mira cu no tin otro alternativa, lo tin cu tuma e paso ey. 

SITUACION

E situacion actual ta cu trahadonan ta ‘hostina’ y nan kier haya un solucion prome cu fin di luna, cu ta e deadline pa un solucion pa nan situacion laboral. Aworaki, falta dos siman pa e trahadonan tin nan ‘ultimo dia di trabou’, sin sa kico ta spera nan despues. E loke cu Dirksz ta premira ta un di dos scenario. Uno unda cu CITGO lo duna un suma di placa, y bandona e isla, of simplemente bandona e isla sin laga nada atras. 

KICO NAN KIER

Loke cu FTA kier ta pa e trahadonan haya nan placa cu nan merece. Y e mester ta placa husto, y no un coi kens manera cu a ofrece e trahadonan caba. CAR a informa e sindicato cu ta un pot di placa tin y for di eynan tin cu paga tur cos. Como tal no tin e loke cu nan (trahadonan) kier, y tin cu paga loke tin. Sindicato kier pa e grupo di trahado cu tin cu bay ,haya nan placa, y e grupo cu por keda, haya un claridad riba kico ta sosode cu nan despues di 31 di januari 2020. Riba nada di esey no tin claridad. 

GOBIERNO

Mientras cu for di gobierno oficialmente e noticia no a sali, e portal aki tin confirma cu gobierno lo a duna orden caba pa e proceso cuminsa pa para un eventual salida di e dos pa tres personanan cu ta responsabel pa CAR aworaki. FTA tambe ta na altura di esey y a compronde cu e mechanismo ta na lugar pa frena cualkier ‘huida’ di e personanan envolvi.