Hensley Meulens di Corsou candidato pa bira manager di team di grandes ligas

NEW YORK – Cu retiro di varios manager di e ekiponan den grandes ligas di baseball Mericano, un nomber cu ta zona hopi como posibel reemplasante, ta Hensley “Bam Bam” Meulens. Varios portal deportivo ta sea sugeri of comenta riba e posibilidad pa Meulens bira e proximo manager di sea New York Mets, of te hasta Boston Red Sox. Ambos ekipo a perde nan manager despues cu nan a keda retira pa e scandal di seña, cu ta data bek na 2017. Meulens den pasado recien tabatin posibilidad pa bira manager di San Francisco Giants, pero no a logra haya e posicion. E ta keda den contienda y ta e bench coach di New York Mets. Den e proximo simanan e lo por haya e yamada y cu cual e por bira e prome Curasoleño y persona den Caribe Hulandes cu ta haya un posicion asina halto den baseball grandes ligas na Merca. Meulens ta un di e prome peloteronan di Caribe Hulandes cu a hunga den MLB ora cu e la subi cu New York Yankees na 1989. Aunke e no a keda hopi como hungador eynan, su carera despues a keda impresionante.