AHATA ta lansa Aruba Magazine

ORANJESTAD - Aruba Hotel & Tourism Association (AHATA) hunto cu nan partner HCP Media - un compania di publicidad y media - ta anuncia e lansamento oficial di su publicacion nobo, Aruba Magazine, e ta un guia di destinacion anual cu e asociacion ta distribui na e bishitantenan di hotelnan miembro di AHATA. E revista aki tambe ta obtenibel den forma digital.

“Nos ta encanta di por provee e bishitantenan cu un mirada profundo y amplio riba e diferente actividad y experencianan cu nos isla ta ofrece. Tanto den e area cultural como tambe historico,” asina Tisa LaSorte, Presidente y CEO di AHATA, a bisa. “Cu HCP su experencia y profesionalidad, nos a crea un publicacion bunita cu ta destaca luganan di interes, actividadnan, arte, gastronomia y hopi mas cu ta defini e ‘One Happy Island”.

Cu un diseño nobo y contenido interesante, tur elemento di e contenido ta duna enfoke na e personalidad unico, historia y aventuranan cu Aruba tin di ofrece na su bishitantenan. AHATA su miembronan y e diferente “advertisers” ta esnan cu ta resalta como negoshinan clave y ta ofrece ofertanan na e bishitante cu tin interes di hasi algo durante nan estadia.

“Creando e revista aki den nomber di AHATA ta un honor pa HCP Media,” asina Marisa Beazel, Presidente y Publicista di HCP Media, a indica. “E ta un oportunidad maraviyoso pa trece e experencianan cu Aruba ta ofrece den e paginanan di Aruba Magazine.”

E revista ta obtenibel desde e luna aki na hotelnan distribuidor miembro di AHATA y online via ahata.com.