Cacique Macuarima School hayando asistencia despues di candela

MACUARIMA – Trabounan a continua diahuebs mainta di limpiesa na Cacique Macuarima School, cu den fin di siman a keda parcialmente destrui (varios lokaal) door di candela intencionalmente cendi. Awe mainta un grupo di bombero tamb a yuda saca tur cos for di e lokaalnan afecta, pa asina por cuminsa cu e trabou di reparacion y limpiesa den e lokaal mes. Segun vocero di bombero Ferdinand Ponson, e grupo di bombero den forma spontaneo a dicidi di haci e trabou pa e scol. Asina tin mas instancia cu a dicidi di pone man na obra pa yuda.

FINANZA

Den un declaracion na e matutino Diario, director di SKOA Anuesca Baly a splica cu tin varios instancia cu ta atendiendo cu e situacion, cada uno riba nan tereno. E bisiñanan ta yudando cu limpiesa rond, un banco (Aruba Bank) a haci un donacion cuantioso y tin mas instancia cu a mustra interes y a duna palabra di lo yuda e scol cu necesidad material si mester. 

OPERACION

Pa loke ta e operacion di e scol, mirando kico a sosode, a dicidi (segun Baly ta conta den e matutino) di pone e muchanan den diferente localidad na Aruba. Esaki pasobra lo dura por lo menos 4 luna di tempo prome cu e scol por keda cla y ta ‘normal’ bek. Tin klas cu a bay keda realoca na Scol Santa Famia, Laura Wernet y un klas a keda den e scol afecta mes, pero a bay ubica nan mes ‘full time’ den e computer lokaal. 

CULPABELNAN

E culpabelnan ainda no a wordo gara, y tin speculacion riba tanto e cantidad di hoben como e edad di nan. Por sinti un rabia den comunidad pa cu e hecho aki y ta pidiendo castigo maximo pa e malechornan aki, unabez cu nan wordo gara y castiga. E caso mes ta bou di investigacion ainda. Potret cortesia Cuerpo di bombero di Aruba.