Aruba cu e prome Automated Passport Control kiosk den Caribe

ORANJESTAD – Aruba tin e prome APC kiosk den Caribe pa procesa pasahero pa Merca. Un total di 10 kiosk automatisa den apenas 7 minuut, ta logra procesa como 100 pasahero den e seccion mericano di nos aeropuerto. Dialuna anochi, Aruba Airport Authority N.V. a introduci un sistema nobo pa controla paspoort na Aeropuerto Internacional Reina Beatrix. E computernan conoci como “Automated Passport Control kiosks” (APC kiosks) ta instala caba y a drenta den funcion e siman aki. Aruba ta e prome den Caribe, cu ta usando e sistema aki, y e di 27 na mundo. Di e mas cu 300 aeropuertonan internacional na Merca, solamente 26 tin APC kiosks pa procesa pasaheronan pa medio di un sistema computerisa. Y awor Aruba ta e di 27 aeropuerto pa implementa e sistema aki.

A adkiri e kiosconan aki for di Vancouver Airport Authority y ta di e tipo “BorderXpress” y ta encera un mehoracion enorme pa e proceso di aduana pa pasaheronan biahando pa Merca. E sistema computerisa ta disponibel pa tur pasahero cu tin un paspoort Mericano y ta U.S. Lawful Permanent Residents (LPR) y pa tur pasahero cu tin un paspoort Canades. E kiosconan tambe ta reconoce registracion di tur pasahero di e 38 paisnan cu no ta rekeri un “U.S. Entry visa” cu tin “Visa Waiver” cu e ESTA (Electronic System for Travel Authorization) completa, cual ta inclui Australia, Japon, Alemania, Hulanda y Inglatera.

E Presidente y C.E.O di Vancouver International Airport (YVR), Craig Richmond, a expresa cu nan ta masha entusiasma cu e partnership cu Aruba Airport Authority N.V. “Como un aeropuerto, nos ta compronde e importancia pa implementa solucionnan innovativo cu ta yuda pasaheronan yega nan destinacion rapido, eficientemente y sigur. Trahando cu Aeropuerto di Aruba ta un oportunidad unico y emocionante pa nos por trece nos solucion BorderXpress Automated Passport Control y experticio den ramo di pre-clearance na luganan pega di Merca of Canada y mehora e proceso di inmigracion pa biaheronan internacional,” C.E.O. Richmond a comenta.

James Fazio, C.E.O di Aruba Airport Authority N.V. ta kere firmemente cu tur pasahero biahando pa Merca lo beneficia di e sistema di APC, tanten cu e kiosconan tambe permiti e departamento di inmigracion di Merca na Aeropuerto pa “streamline” nan procesonan di ehecucion. James Fazio a expresa: “Esaki ta e prome paso di un proyecto hopi mas grandi pa streamline e fluho di pasahero, cu lo wordo completa den e siguiente añanan. E adkisicion strategico aki lo beneficia casi 60% di e total di pasaheronan biahando pa destinacionnan den Merca for di Aruba pa medio di reduccion di temponan pa warda na e parti US CBP pre-clearance y na final di dia ta facilita un experiencia mas positivo di parti di e pasahero cu ta biahando”.

E introduccion di e kiosconan ta tumando luga den un temporada pisa di biahe, durante cu Aruba en general y Aruba Airport Authority N.V. ta disfruta di high season, cu concentracion halto di pasaheronan. Cu diferente vuelonan adicional y fluho mas grandi ainda di usuario, ta premira un otro temporada record pa Aeropuerto Internacional Reina Beatrix y turismo di Aruba.