CITGO Aruba ainda no a pidi retiro, pero a cuminsa ‘shut down’

SAN NICOLAS – Mientras cu e discussion di retiro di personal di CITGO Aruba Refinery ta sigui presente, tin otro accionan tumando lugar paralelo na esey. Entre nan, noticiacla.com a compronde cu a cuminsa un ‘proceso di shut down interno operacional’ caba na e compania.Te ainda, no tin ningun peticion pa retiro cu a bay pa e departamento concerni di gobierno, y no tin ningun acuerdo firma di retiro entre trahadonan y e compania. Pero loke cu a compronde ta cu e compania ta tumando mas pasonan en preparacion di nan salida. 

SHUT DOWN

Pa loke ta e shut down, por compronde cu e compania lo a cuminsa cancela tur su contractnan cu e tin, cuentanan pendiente, cu ta nifica cu pa fin di luna, e lugar por keda sin e necesidadnan basico manera awa, coriente y te hasta seguridad pa e lugar. Tur ta pasonan cu ta indica cu e compania ta determina pa cera su operacion aki dos siman manera anuncia anteriormente. 

SALIDA

Manera cu e portal aki a raporta caba, e compania no a entrega peticion pa retiro di su trahadonan (te cu dialuna ultimo gobierno no a ricibi ningun peticion segun minister di labor Glenbert Croes). Y for di sindicato, a compronde cu e proceso di retiro ta tuma entre 2 pa 3 luna di tempo, y falta apenas 2 siman pa tur cos keda cla.