Pueblo a responde pa yuda salud di Fernando Frank tambe

ORANJESTAD – Famia y amigonan di Fernando Frank a uni forza diadomingo den un intento pa recauda suficiente fondo (50.000) pa su salud. Un siman despues cu comunidad a haci mescos pa e conocido musico Hildward Croes, tabata turno e biaha ki pa yuda Frank. E ta sufri di un malesa grave (fase 4 di cancer di pulmon ) y mester di e fondonan pa sigui tratamento alternativa cu AZV no ta cubri. Como tal a tene e evento grandi na Piedra Plat entertainment Center y pa atardi, a tende cu a logra colecta 10.000 florin (aunke pa aworaki e por ta mucho mas).

Segun un raportahe den e matutino Bon Dia Aruba, Fernando ta na un clinica na Miami pa un tratamento alternativa y esaki AZV no ta cubri. E ta den e fase 4 di cancer di pulmon y e malesa a extende pa otro organo tambe. Segun su casa AZV ta cubri terapia kimico so pero esaki ta haci dan?o tambe. Pues a scoge pa un tratamento alternativa pa asina extende e resto di tempo pero tambe e calidad di bida, e ta splica. “Nos ta realistico, pero nos y Fernando tambe tin hopi fe cu tur cos lo sali bon.”

Entre actividadnan tabatin koffiemorgen. Gaita a cuminsa toca y ham di pasco a yega y tabatin e banda Buleria tambe. Si persona no a haya e chens pa pasa ayera, ainda por duna riba e cuenta di CMB 22228706, cu ta riba nomber di SV WEB.