DIP a constata construccion illegal den besindario di Bucutiweg

Posted on 01/14/2020 9:15 am AST | Updated on 01/14/2020 9:15 am AST

ORANJESTAD – Recientemente durante control DIP a bin constata un construccion ilegal den vecindario di Bucutiweg cu ta tumando lugar, na unda cu esnan responsabel a korta varios cadushi, mangroven y matanan cu ta protehi pa ley. Alabes, e construccion cu ta tumando lugar, ta cay den un area protehi pa ley (Natuurgebied). Inmediatamente a involucra varios departamento di Gobierno pa presenta na sito pa nan por traha un rapport di e caso. 

Como DIP a constata cu nan a cuminsa rosa sin un: 

1.      “Aanlegvergunning”

2.      Nan no tin permiso pa construi riba e sitio

3.      E area unda cu nan kier construi, ta protehi pa ley desde aña 2009 na momento cu e ROP a bin na vigor, y tambe den e ROP nobo di 2019. E ta cay den Natuurgebied.

DNM a constata cu:

1.      A korta varios cadushi “Stenocerus Griseus” cu ta protehi den nos leynan

2.      A Korta mata di “Wayaca”

3.      A korta algun “Mangroven” tambe na e sitio.

Despues cu a Analisa tur e daño cu a wordo cometi na e sitio, y na e momento ey na DIP no tabata conoci kende ta esnan responsabel pa e acto aki, a opta cu diabierna mainta lo sali cu un team pa ruim op. Pa suerte e mesun team a regresa na e sitio diahuebs den horanan di atardi, y nan a bin encontra un persona na sitio, cu no por a demostra ningun document legal. A dune orden pa e para e construccion di biaha, y pa ruim op tur cos.

Diabierna mainta na yegada di e varios departamentonan pa cuminsa ruim op, 2 persona responsabel pa e construccion illegal a presenta na sitio y pa splica cu nan a haci un peticion pa nan obtene e lugar pa nan por construi. Empleadonan di DIP a splike cu DIP no tin nada registra y cu e mester cuminsa haci e lugar limpi, y si e no por, DOW lo haci esaki, y lo bay riba su costo. Ambos a opta pa yama un reunion cu character di urgencia cu Director di DIP pa presenta nan caso pa dilanti, Na final, Director a splicanan no ta pasobra cu bo a solicita pa un permiso, esey ta duna bo derecho pa cuminsa construi di biaha. Bo persona mester cana e caminda manera tur hende, y mester warda riba bo aprobacion pa construi legalmente. A informa ambos persona cu DIP lo duna nan un total di 5 dia, pa nan por ruim op tur cos for di e sitio. 

Di parti DNM, ambos persona a wordo informa cu lo tin un proceso cu mester cuminsa cana su lugar, pa e dañonan cu a wordo cometi na e sitio. Esaki lo por resulta den un multa. Tur intencion ta mustra cu lo kier a construi un Rancho sin permiso nan necesario. Como DIP aña pasa a haci un jamada pa tur hende cu tin un rancho, pasa na DIP y registra esaki, pa asina nos por sa cuanto rancho tin rond di Aruba y kende ta e doñonan. 

Locual cu DIP ta constatando cu varios persona awo ta core y ta construi rancho y despues kier bin registra esaki. DIP kier avisa, cu esaki lo no wordo tolera y lo actua contra tur esnan cu no ta aparece riba e mapa prome cu e jamada pa re-inscribi.

 

Un biaha mas, e mensahe di DIP ta, pa nos comunidad actua conforme ley ta prescribi, pa evita cu mayan bo persona lo haya problema cu ley y un gasto insperadamente.

  • Powered by SETAR