Minister ta confirma retiro di Ezzard Cilie na Hospital

EAGLE. - Minister Dangui Oduber a confirma e exit di Ezzard Cilie na Hospital pa noticiacla.com dialuna anochi. Manera ta conoci, for di luna di juni 2019 ja caba minister Oduber a expresa e deseo pa busca un remplazante pa sr Ezzard Cilie cu ta director bedrijfsvoering na hospital considerando e hecho cu su contrato lo a termina na december 2019 y a yega su edad di pensioen. E minister no tawata di acuerdo cu maneho di hospital. Hunta di supervision no tawata di acuerdo cu esaki y hasta kier a prolonga contrato di sr Cilie y no a percura pa busca su remplazante. 

Minister Oduber a informa e hunta di supervision riba esaki y a bisa nan pa cuminsa busca un remplazante for di masha tempo. E situacion na hospital no ta esun di mihor y esaki tin di haber cu maneho di hospital y tambe e supervision cu tawata tin. Na december 2019 minister Oduber a dirigi un carta fuerte na miembronan di hunta di supervision caminda a pidi nan pa entrega nan retiro. Segun su declaracion, awe e mandatario ta bin haya rason pasobra for di hopi tempo ta pidiendo pa cambio y no tawata haya oido. "Tur hende a cansa y fada di e manera con hospital ta wordo maneha pasobra hospital tin hopi bon hende den servicio, tin hopi hende kier mira cambio, hopi hende cu curason pa cuido pero simplemente cu e bestuur aki no a mira adelanto".  Segun Oduber, e specialistanam medico a entrega un mocion di desconfianza y 95% di e miembronan vota na fabor di e mocion aki. Ta obvio cu despues di esaki tur hende mester saca nan conclusion.Minister Dangui Oduber ta sigui bisa cu e ta convenci cu un era nobo lo cuminsa na hospital caminda lo cuminsa atende cu e problemanan cu tin y trece cambio den maneho pa mehora e servicio. Hospital tin tur e potencial pa bira un tremendo hospital y cu e cambionan na caminda lo bai cumpli cu esaki tambe! " Communidad por bai spera hopi cambio cu lo ta na beneficio di cuido medico na Aruba. Hunto cu esnan na hospital lo logra esaki." Oduber a finalisa bisando.