Grupo di ciudadano a entrega minister Knops kehonan riba gabinete Wever

ORANJESTAD – Un grupo di ciudadano a presenta dialuna atardi na e oficina di representacion di Hulanda (VNO), pa topa cu minister Hulandes Raymond Knops. Na final di un conferencia, Knops a bin pafo y atende cu e grupo y ricibi e documentonan cu a keda presenta na dje. Segun vocero di e grupo, Melvin Tromp (cu a introduci su mes como e vocero di partido di oposicion AVP), e grupo a tuma nota di e bishita di Knops, y kier a probecha pa dune un serie di documento. 

KEHONAN CONTRA CORUPCION GUBERNAMENTAL

Ta trata di kehonan cu e grupo tabatin contra gabinete Wever Croes, particularmente corupcion gubernamental pa cual nan a entrega keho caba na ministerio publico. Knops a ricibi e documentonan, a gradici pa esaki y bay bek paden. E no a compromete di lo contesta e grupo ni a bisa kico e lo bay haci cu e documentonan, pero a gradici e grupo y a bisa cu e ta topa cu tur hende y pues den e caso aki cu nan tambe. E grupo tabata para cu algun pancarta, y despues di e entrega, a bandona e sitio.