Knops: Loke Aruba a ofrece Hulanda aña pasa, no ta realisabel

ORANJESTAD – “Mi ta constata cu loke cu ta ofreci den e carta, por lo menos esey lo no ta realisabel”. Asina minister Hulandes Raymond Knops a contesta noticiacla.com dialuna den un conferencia di prensa riba e carta cu premier Wever a ofrece na e mandatario Hulandes aña pasa, como solucion pa e situacion financiero di Aruba, entre nan e tema di begrotingskamer’, cu gobierno di Aruba kier introduci. Entre e ‘oferta haci’, Wever a pidi Hulanda tempo di 7 pa 8 luna pa CAFt sigui haci e trabou di supervision, y pa despues di e periodo ey, gobierno di Aruba introduci su begrotingskamer cu lo mester ta cla pa e tempo ey. Hulanda sinembargo, tin otro pensamento. 

CARTA CU OFERTA

Tabata dia 8 di November 2019 cu prome minister Wever a manda un carta pa Knops, unda cu e ta presenta un serie di sugerencia di gobierno di Aruba kier atende pa por cumpli cu e maneho financiero. Entre nan, e plan pa keda cla cu e cambio di ley riba finanzas duradero, cu segun e carta, lo mester ta cla mitar di e aña aki. Den e mesun carta, Wever ta pidi Knops pa laga CAFt sigui eherce su control financiero conforme e LAFT actual y e protocol di 2018, lagando e amienda cu Parlamento a aproba aña pasa, afor. E lista di sugerencia y plan cu gobierno di Aruba a presenta, lo mester a convence Hulanda cu Aruba ta haciendo suficiente pa asina evita un ‘instruccion’ riba e tereno financiero. Hulanda sinembargo pues, ta pensa otro. 

MAS TEMPO

E portal aki a compronde cu Hulanda (lesa: Gobierno di Hulanda) ta aplaudi e intencion politico di gobierno pa bin cu su begrotingskamer cual e tin tur derecho pa presenta. Pero gobierno no mester kere cu esaki por keda realisa den 7 pa 8 luna. Esaki pasobra prome cu por introduci e begrotingkamer, mester tin tur asunto financiero den ordo, y mester prueba pa algun aña (ta haci mencion di 2 pa 3 aña sigur), cu enberdad Aruba por maneha su situacion y cu ‘apenas’ den e prome aña. Y aworaki Hulanda no ta convenci cu Aruba ta asina leu, ni cu e lo ta asina leu den e tempo stipula pa Aruba. Hulanda kier wak e patronchi di cambio financiero positivo aki algun aña y tin e siguransa cu Aruba enberdad por maneha su asuntonan. Y e ora ey, por papia di un begrotingskamer operacional. Lesa e carta completo AKI