Gobierno a admiti di a paga laat y pesey plachinan di auto ta laat

ORANJESTAD – E hecho cu gobierno a paga e compania cu traha plachi di number di auto laat, a pone cu e plachinan no ta disponibel awor sino te maart di e aña aki. Riba pregunta di noticiacla.com, e mandatario encarga cu finanza, Xiomara Maduro a admiti cu a faya den e parti aki y cu ta te na December a logra paga e compania. E plachinan mientrastanto ta na caminda pa Aruba pero no ta keda cla  prome cu maart pa entrega. 

CUSTUMBER

Ta custumber cu pa fin di aña, e plachi di numbernan ta na Aruba caba, y cu por te hasta haya esaki na December caba. Pero tabata na December cu e informacion a bin cu mientras cu por pagan a December caba (for di 16 di December 2019), e plachinan di number tabata disponibel te na maart di e siguiente aña. Esnan di nomber (naamplaten) si lo tabata disponibel asina aña habri, pasobra eseynan si ta wordo traha na Aruba mes pa un compania local. Y ora cu a bay averigua, a bin compronde cu ta gobierno (lesa: departamento di di finanzas) a faya, y a pone cu no tabatin placa presupuesta mas pa paga e compania en cuestion na tempo. 

EHERCICIO PA PRESUPUESTO

Segun Maduro, ora cu departamento di finanza a haci ehercicio aña pasa pa corta gasto den presupuesto, conforme peticion di CAFT, a corta tambe den e parti aki di pago di plachi di number di auto, pa posibel ekibocacion, cu a pone cu durante e presupuesto supletorio, mester a pidi fondo extra pa por a finalmente paga e compania pa nan por a traha e plachinan di number nobo pa 2020. Pues a corta den presupuesto te corta unda cu no mester a corta. Unabez cu a ‘remedia e situacion’, e plachinan por a wordo traha y manda pa Aruba.